Postal Department Recruitment Scam: પોસ્ટલ વિભાગની ભરતી કૌભાંડ મામલે સીબીઆઈએ ગુરુવારે ઓડિશામાં 67 સ્થળો પર દરોડા પાડ્યા હતા. આ કૌભાંડમાં એક વર્ષ પહેલા ફરિયાદ નોંધાઈ હતી. ફરિયાદમાં કહેવાયું છે કે ગ્રામીણ ડાક સેવકની પરીક્ષામાં 63 ઉમેદવારોએ કથિત રીતે નકલી દસ્તાવેજો રજૂ કર્યા હતા.
ઓડિશાના આ જિલ્લાઓમાં દરોડા પાડવામાં આવ્યા
પોસ્ટલ વિભાગના કથિત કૌભાંડમાં 204 અધિકારીઓએ દરોડા પાડ્યા હતા. જેમાંથી 122 અધિકારીઓ સીબીઆઈના અને 82 અન્ય વિભાગના છે. કાલાહાંડી, નૌપાડા, રાયગઢ, નબરંગપુર, કંધમાલ, કેંદુઝાર, મયુરભંજ, બાલાસોર અને ભદ્રક જિલ્લામાં વિવિધ સ્થળોએ દરોડા પાડવામાં આવ્યા હતા.
સીબીઆઈનું કહેવું છે કે ‘કથિત નકલી દસ્તાવેજો બોર્ડ ઓફ હાઈસ્કૂલ એન્ડ ઈન્ટરમીડિયેટ એજ્યુકેશન, અલ્હાબાદ, પશ્ચિમ બંગાળ બોર્ડ, કોલકાતા, ઝારખંડ એકેડેમિક કાઉન્સિલ, રાંચી વગેરે તરફથી જારી કરવામાં આવ્યા હતા. ફરિયાદમાં જણાવાયું છે કે આ કેસમાં આંતરરાજ્ય ગેંગ પણ સામેલ હોઈ શકે છે, જે ઉમેદવારોને નકલી દસ્તાવેજો ઈશ્યુ કરે છે.
1382 જગ્યાઓ માટે ભરતી કરવામાં આવી હતી
ટપાલ વિભાગે ગ્રામીણ ડાક સેવકની 1382 જગ્યાઓ માટે અરજીઓ મંગાવી હતી, જેના માટે તેણે 27 જાન્યુઆરી 2023ના રોજ ઓનલાઈન અરજીઓ મંગાવી હતી. ભરતી માટે ન્યૂનતમ લાયકાત માન્ય બોર્ડમાંથી 10મું પાસ હતી. ઉપરાંત સ્થાનિક ભાષાના જ્ઞાનની પણ શરત હતી.
તમામ ઉમેદવારોને તેમના શૈક્ષણિક દસ્તાવેજો અને પ્રમાણપત્રો કેન્દ્રિય સર્વર પર સબમિટ કરવાની સૂચના આપવામાં આવી હતી. તપાસમાં બહાર આવ્યું છે કે બલેશ્વર, મયુરભંજ, કાલાહાંડી વગેરે જિલ્લાઓમાં 63 ઉમેદવારોએ નકલી પ્રમાણપત્રો રજૂ કર્યા હતા.
