Pakistan Women Team: મહિલા T20 એશિયા કપ 19 થી 28 જુલાઈ દરમિયાન શ્રીલંકાના દામ્બુલામાં યોજાશે. હવે મહિલા ટી20 એશિયા કપ માટે પાકિસ્તાની ટીમની જાહેરાત કરવામાં આવી છે. નિદા ડારને કેપ્ટનશિપની જવાબદારી મળી છે. તાજેતરમાં, પાકિસ્તાની ટીમનો ચાર દિવસીય તાલીમ શિબિર હતો, જે શનિવારે કરાચીમાં સમાપ્ત થયો હતો. આયેશા ઝફર અને નતાલિયા પરવેઝ જેવી ખેલાડીઓને પાકિસ્તાની ટીમમાંથી બહાર કરવામાં આવી છે.
આ ખેલાડીઓને તક મળી નથી
આયેશા ઝફર, નતાલિયા પરવેઝ, રમીન શમીમ, સદફ શમાસ, ઉમ્મ-એ-હાની અને વહીદા અખ્તરને ટી-20 એશિયા કપ માટે પાકિસ્તાનની મહિલા ટીમમાં સ્થાન મળ્યું નથી. આ ખેલાડીઓ ગયા મહિને ઈંગ્લેન્ડના પ્રવાસે ગયેલી ટીમનો ભાગ હતા. આ સિવાય પસંદગીકારોએ ઈરમ જાવેદ, ઓમાઈમા સોહેલ, સૈયદા અરુબ શાહ અને તસ્મિયા રુબાબ પર વિશ્વાસ વ્યક્ત કર્યો છે. ઈરમ જાવેદ, ઓમાઈમા સોહેલ, સૈયદા અરુબ શાહ આ ત્રણેય ખેલાડીઓ લાંબા સમયથી ટીમની બહાર હતા. ત્રણેય ખેલાડીઓએ વર્ષ 2023માં તેમની છેલ્લી T20 આંતરરાષ્ટ્રીય મેચ રમી હતી. પરંતુ હવે આ ખેલાડીઓ ટીમમાં પરત ફર્યા છે.
22 વર્ષની ફાસ્ટ બોલર તસ્મિયા રૂબાબ ટીમમાં એકમાત્ર અનકેપ્ડ ખેલાડી છે. તેણે નવેમ્બર 2023માં વેસ્ટ ઈન્ડિઝ-A સામે પાકિસ્તાન-A માટે મેચ રમી છે. રાષ્ટ્રીય વનડે ટૂર્નામેન્ટ 2023-24માં મુલતાન તરફથી રમતા તેણે 86 રન અને 12 વિકેટ પણ લીધી હતી. તસ્મિયાએ રાષ્ટ્રીય મહિલા T20 ટૂર્નામેન્ટ 2023-24માં 6.36ના ઇકોનોમી રેટથી ચાર વિકેટ પણ લીધી હતી.
મોહમ્મદ વસીમ પાકિસ્તાની મહિલા ટીમના કોચ છે
મોહમ્મદ વસીમને હાલમાં જ પાકિસ્તાન મહિલા ટીમનો કોચ બનાવવામાં આવ્યો છે. અબ્દુર રહેમાન સ્પિન બોલિંગ કોચ છે. જુનૈદ ખાન આસિસ્ટન્ટ કોચ છે. T20 એશિયા કપ માટે, પાકિસ્તાનની મહિલા ટીમને ભારત, નેપાળ અને UAEની સાથે ગ્રુપ Aમાં રાખવામાં આવી છે. જ્યારે ગ્રુપ ‘બી’માં શ્રીલંકા, બાંગ્લાદેશ, થાઈલેન્ડ અને મલેશિયા છે. દરેક ગ્રૂપમાંથી ટોપ-2 ટીમ સેમિફાઇનલમાં પ્રવેશ કરશે.
T20 એશિયા કપ માટે પાકિસ્તાનની મહિલા ટીમની ટીમઃ
નિદા દાર (કેપ્ટન), આલિયા રિયાઝ, ડાયના બેગ, ફાતિમા સના, ગુલ ફિરોઝ, ઈરમ જાવેદ, મુનીબા અલી, નાઝીહા અલ્વી, નશરા સુંધુ, ઓમાઈમા સોહેલ, સાદિયા ઈકબાલ, સિદ્રા અમીન, સૈયદા અરુબ શાહ, તસ્મિયા રુબાબ અને તુબા હસન.
