ભારતના વિદેશ મંત્રી એસ જયશંકર SCO બેઠકમાં ભાગ લેવા પાકિસ્તાન જશે. લાંબા મંથન બાદ ભારતે હવે શાંઘાઈ કોઓપરેશન ઓર્ગેનાઈઝેશન (SCO)ની બેઠકમાં ભાગ લેવાની જાહેરાત કરી છે. 10 વર્ષ પછી કોઈ ભારતીય વિદેશ મંત્રી પાકિસ્તાનની મુલાકાતે છે. SCO સમિટ 15-16 ઓક્ટોબરના રોજ પાકિસ્તાનની રાજધાની ઈસ્લામાબાદમાં યોજાવા જઈ રહી છે. ભારતે લાંબી વિચાર-વિમર્શ બાદ આ સમિટમાં ભાગ લેવાનો નિર્ણય કર્યો છે. વિદેશ મંત્રાલયે તેની પુષ્ટિ કરી છે. શુક્રવારે, મંત્રાલય દ્વારા કહેવામાં આવ્યું હતું કે એસ જયશંકર SCO બેઠકમાં ભારતનું પ્રતિનિધિત્વ કરશે.
ભારતનો પાકિસ્તાન સાથે લાંબા સમયથી રાજદ્વારી તણાવ ચાલી રહ્યો છે. બંને દેશો વચ્ચેના સંબંધો નહિવત છે. પાકિસ્તાને ઓગસ્ટ મહિનામાં SCO સમિટ માટે ભારત સહિત ઘણા દેશોને આમંત્રણ મોકલ્યા હતા. પાકિસ્તાની પ્રવક્તા મુમતાઝ ઝહરા બલોચે આ વાતની પુષ્ટિ કરી છે. તેમણે કહ્યું હતું કે ભારતીય વડાપ્રધાન નરેન્દ્ર મોદીને કોન્ફરન્સમાં ભાગ લેવા માટે આમંત્રણ આપવામાં આવ્યું છે. ત્યારે ભારતીય પક્ષ તરફથી એ વાતનો ખુલાસો કરવામાં આવ્યો ન હતો કે બેઠકમાં કોણ ભાગ લેવા જશે? હવે સ્પષ્ટ છે કે પીએમ મોદી સમિટમાં ભાગ લેવા નહીં જાય. તેમના સ્થાને વિદેશ મંત્રી એસ જયશંકર ભારતનું પ્રતિનિધિત્વ કરશે.
પ્રવાસ શા માટે મહત્વપૂર્ણ છે?
તમને જણાવી દઈએ કે ઈસ્લામાબાદમાં યોજાનારી સમિટમાં વરિષ્ઠ અધિકારીઓ અને મંત્રીઓ વચ્ચે અનેક રાઉન્ડની વાતચીત થશે. દેશો વચ્ચે આર્થિક, સામાજિક અને પરસ્પર સહયોગ અંગે ચર્ચા થશે. SCOમાં મુખ્યત્વે ચીન, ભારત, રશિયા, કઝાકિસ્તાન, પાકિસ્તાન, તાજિકિસ્તાન, ઉઝબેકિસ્તાન અને કિર્ગિસ્તાનનો સમાવેશ થાય છે. આ પ્રવાસ ભારત માટે મહત્વપૂર્ણ માનવામાં આવે છે. નિષ્ણાંતોના મતે એસ જયશંકરની આ મુલાકાત આગામી પડકારો અને તકો વચ્ચે નવો સંવાદ સ્થાપિત કરવાની શ્રેષ્ઠ તક બની શકે છે. આ પ્રવાસ ભારત-પાકિસ્તાનના સંબંધોમાં કેટલો સકારાત્મક પરિવર્તન લાવે છે તે જોવું રહ્યું.
