પીઢ સંગીતકાર-ગાયક એ.આર. રહેમાનને અચાનક છાતીમાં તીવ્ર દુખાવાની ફરિયાદ બાદ હોસ્પિટલમાં દાખલ કરવામાં આવ્યા છે. રહેમાનને ચેન્નાઈની એપોલો હોસ્પિટલના ઇમરજન્સી વિભાગમાં દાખલ કરવામાં આવ્યા હતા. નિષ્ણાત ડોક્ટરોની એક ટીમ અહીં તેમની સારવાર કરી રહી છે. ઓસ્કાર વિજેતા રહેમાનને સવારે 7.30 વાગ્યાની આસપાસ હોસ્પિટલમાં દાખલ કરવામાં આવ્યા હતા, ત્યારબાદ તેમના પર એન્જીયોગ્રાફી, ઇસીજી અને ઇકોકાર્ડિયોગ્રામ જેવા પરીક્ષણો કરવામાં આવ્યા હતા. રહેમાન ગયા વર્ષે નવેમ્બરમાં પોતાના અંગત જીવનને લઈને ચર્ચામાં હતા. તેમણે અને તેમની પત્ની સાયરા બાનુએ 29 વર્ષના લગ્નજીવન પછી અલગ થવાની જાહેરાત કરી હતી.
તાજેતરમાં, રહેમાનની ભૂતપૂર્વ પત્ની સાયરા બાનુની સર્જરી થઈ, જેના પછી તેણીએ સુપ્રસિદ્ધ સંગીતકારનો તેમના સમર્થન બદલ આભાર માન્યો. એક અહેવાલ મુજબ, રહેમાન તાજેતરમાં જ વિદેશથી પરત ફર્યા હતા અને પહેલા તેમને ગરદનમાં અને પછી છાતીમાં દુખાવો થયો. જ્યારે રહેમાનનો દુખાવો વધી ગયો, ત્યારે તેને રવિવારે સવારે હોસ્પિટલમાં દાખલ કરવામાં આવ્યો. સોશિયલ મીડિયા પર આ સમાચાર આવ્યા પછી, ચાહકો તેમના પ્રિય સંગીતકારના સ્વાસ્થ્યમાં ઝડપથી સુધારો થાય તે માટે પ્રાર્થના કરી રહ્યા છે.
એ.આર. રહેમાનના સંગીત સાથે આગામી ફિલ્મો
આ વર્ષે એઆર રહેમાનની બે ફિલ્મો બોક્સ ઓફિસ પર રિલીઝ થઈ છે. વિક્કી કૌશલ અને રશ્મિકા મંડન્ના અભિનીત ફિલ્મ ‘ચાવા’એ બોક્સ ઓફિસ પર શાનદાર પ્રદર્શન કર્યું, તો કાધલિક્કા નેરામિલ્લઈને પણ દર્શકો તરફથી ઘણો પ્રેમ મળ્યો. બંને ફિલ્મોમાં રહેમાનના સંગીતની ખૂબ પ્રશંસા થઈ. આગામી ફિલ્મો વિશે વાત કરીએ તો, રહેમાનના ઘણા પ્રોજેક્ટ્સ હાલમાં નિર્માણના વિવિધ તબક્કામાં છે. તે દિગ્દર્શક મણિરત્નમ સાથે ‘ઠગ લાઈફ’ના સંગીત પર કામ કરી રહ્યો છે. આ ઉપરાંત, ‘લાહોર 1947’, ‘તેરે ઇશ્ક મેં’, ‘રામાયણ’ અને ‘RC16’ પણ તેમના આગામી પ્રોજેક્ટ્સમાં સામેલ છે.
