નર્સને લગ્નના કારણે નોકરીમાંથી કાઢવી મોંઘી પડી, સુપ્રીમ કોર્ટે આપ્યો કડક ફેંસલો

લગ્નના આધારે નર્સને નોકરીમાંથી બરતરફ કરવાના મામલાની સુનાવણી કરતા સુપ્રીમ કોર્ટે મહત્વનો નિર્ણય સંભળાવ્યો છે. કોર્ટે કહ્યું છે કે લગ્નના આધારે મહિલાની નોકરીને સમાપ્ત કરવી એ લિંગ ભેદભાવનો મોટો મામલો છે અને લિંગ પૂર્વગ્રહ પર આધારિત કોઈપણ કાયદો બંધારણીય રીતે અસ્વીકાર્ય છે. આ પછી કોર્ટે મહિલાને બાકી રકમ તરીકે 60 લાખ રૂપિયા ચૂકવવાનો આદેશ આપ્યો છે. મિલિટરી નર્સને લગ્ન બાદ નોકરીમાંથી કાઢી મૂકવામાં આવી હતી.

જસ્ટિસ સંજીવ ખન્ના અને દીપાંકર દત્તાની બેન્ચે સેલિના જ્હોનની વિનંતી પર આ આદેશ આપ્યો હતો, જેને 1988માં તેના લગ્ન પછી નોકરીમાંથી કાઢી મૂકવામાં આવી હતી. તે સમયે, તેણીએ લેફ્ટનન્ટનો હોદ્દો સંભાળ્યો હતો. તેણે 2012 માં આર્મ્ડ ફોર્સીસ ટ્રિબ્યુનલનો સંપર્ક કર્યો હતો, જેણે તેની તરફેણમાં ચુકાદો આપ્યો હતો અને આદેશ આપ્યો હતો કે તેને પુનઃસ્થાપિત કરવામાં આવે. જો કે, 2019માં કેન્દ્રે આ આદેશ સામે સુપ્રીમ કોર્ટમાં અપીલ કરી હતી.

NDTV અનુસાર, 14 ફેબ્રુઆરીના આદેશમાં બેન્ચે કહ્યું હતું કે ટ્રિબ્યુનલના નિર્ણયમાં કોઈ દખલ કરવાની જરૂર નથી. કોર્ટે નોંધ્યું હતું કે 1977 માં રજૂ કરાયેલ એક નિયમ, જે લગ્નના આધારે લશ્કરી નર્સિંગ સેવામાંથી બરતરફીની મંજૂરી આપતો હતો, તે 1995 માં પાછો ખેંચી લેવામાં આવ્યો હતો.

સુપ્રીમ કોર્ટની બેન્ચે કહ્યું હતું કે આવો નિયમ સ્પષ્ટપણે મનસ્વી છે, કારણ કે તેના લગ્નને કારણે મહિલાની નોકરીને સમાપ્ત કરવી એ લિંગ ભેદભાવ અને અસમાનતાનો ગંભીર મામલો છે. આવા પિતૃસત્તાક ધોરણોને સ્વીકારવાથી માનવીય ગૌરવ, બિન-ભેદભાવ અને ન્યાયી વ્યવહારનો અધિકાર ઓછો થાય છે. કાયદા અને નિયમો પર આધારિત લિંગ પૂર્વગ્રહ બંધારણીય રીતે અસ્વીકાર્ય છે. સ્ત્રી કર્મચારીઓના લગ્ન અને ઘરેલું ભાગીદારીને પાત્રતા નકારવા માટેનો આધાર બનાવવાના નિયમો ગેરબંધારણીય હશે.