Afzal Ansari : ઉત્તર પ્રદેશની ગાઝીપુર લોકસભા સીટથી સમાજવાદી પાર્ટીના સાંસદ અફઝલ અંસારીને અલ્હાબાદ હાઈકોર્ટમાંથી મોટી રાહત મળી છે. હાઈકોર્ટે ગાઝીપુર MP MLA કોર્ટના નિર્ણયને રદ્દ કરી દીધો છે. ગેંગસ્ટર કેસમાં નીચલી કોર્ટે અફઝલ અંસારીને 4 વર્ષની જેલની સજા ફટકારી હતી. આ કેસની સુનાવણી પૂર્ણ થયા બાદ હાઈકોર્ટે 4 જુલાઈએ પોતાનો નિર્ણય અનામત રાખ્યો હતો.
અફઝલ અંસારીને ગેંગસ્ટર કેસમાં ગયા વર્ષે 29 એપ્રિલે 4 વર્ષની જેલની સજા ફટકારવામાં આવી હતી. અફઝલ અન્સારીને જેલમાં જવું પડ્યું કારણ કે તેને 4 વર્ષની સજા થઈ હતી અને તેની સંસદ સભ્યતા પણ રદ કરવામાં આવી હતી. જોકે, બાદમાં સુપ્રીમ કોર્ટ દ્વારા તેમની સજા પર સ્ટે મુકવાને કારણે તેમનું સભ્યપદ પુનઃસ્થાપિત કરવામાં આવ્યું હતું. હવે હાઈકોર્ટના જસ્ટિસ સંજય કુમાર સિંહની સિંગલ બેન્ચે નીચલી કોર્ટના નિર્ણયને રદ કરી દીધો છે.
સજા બાદ હાઈકોર્ટમાં અપીલ દાખલ કરવામાં આવી હતી
સાંસદ-ધારાસભ્ય કોર્ટે સજા ફટકાર્યા બાદ સપા નેતાએ હાઈકોર્ટમાં ફોજદારી અપીલ દાખલ કરી હતી. હાઈકોર્ટે 24 જુલાઈ, 2023ના રોજ અન્સારીને જામીન આપ્યા હતા, પરંતુ તરત જ સજા પર રોક લગાવવાનો ઈન્કાર કર્યો હતો. અફઝલ અંસારીને જામીન મળ્યા બાદ જેલમાંથી મુક્ત કરવામાં આવ્યો હતો. મુખ્તાર અંસારીના મોટા ભાઈ અફઝલ અંસારી પાંચ વખત ધારાસભ્ય અને બે વખત સાંસદ રહી ચૂક્યા છે.
કૃષ્ણાનંદ રાયની હત્યા સાથે સંબંધિત ગેંગસ્ટર કેસમાં સજા સંભળાવવામાં આવી છે.
અફઝલ અંસારીને આ સજા બીજેપી નેતા કૃષ્ણાનંદ રાયની હત્યા સાથે જોડાયેલા ગેંગસ્ટર કેસમાં આપવામાં આવી છે. આ કેસમાં કૃષ્ણાનંદ રાયના પુત્ર પીયૂષ રાયે ક્રિમિનલ રિવિઝન માટે અરજી કરી છે અને યુપી સરકારે પણ હાઈકોર્ટમાં અરજી કરી છે. આ બંને અપીલમાં અફઝલ અંસારીને આપવામાં આવેલી 4 વર્ષની સજાને વધારીને 10 વર્ષ કરવાની માંગ કરવામાં આવી હતી.
સંસદ સભ્યપદ પર કોઈ અસર નથી
હાઈકોર્ટના નિર્ણય બાદ હવે અફઝલ અંસારીની સંસદ સભ્યતા પણ અકબંધ રહેશે. આ ચૂંટણીમાં પણ અંસારી સાંસદ તરીકે ચૂંટાયા છે. હાઈકોર્ટે સજા રદ કર્યા બાદ હવે તેમને જનપ્રતિનિધિત્વ કાયદો પણ લાગુ નહીં પડે.
આ કાયદા અનુસાર જો કોઈ સાંસદ કે ધારાસભ્યને બે વર્ષ કે તેથી વધુની સજા થાય છે તો તેનું સભ્યપદ બંધ થઈ જાય છે અને તેને ગેરલાયક જાહેર કરવામાં આવે છે. તેમજ સજા ભોગવ્યા બાદ તે આગામી છ વર્ષ સુધી ચૂંટણી લડી શકશે નહી.
