MODI 3.0: મોદીના કેબિનેટમાં સૌથી ધનિક સાંસદનું પણ નામ, જેની સંપત્તિ કુલ આટલા કરોડની છે, જાણો કોણ છે એ વ્યક્તિ
વડાપ્રધાન નરેન્દ્ર મોદી આજે સાંજે 7.15 કલાકે ત્રીજી વખત પીએમ પદના શપથ લેશે. એવી આશા છે કે પીએમ નરેન્દ્ર મોદીની સાથે ઓછામાં ઓછા 30 સાંસદો પણ મંત્રી પદ માટે શપથ લેશે. અમિત શાહ, રાજનાથ, નીતિન ગડકરી ઉપરાંત TDP-JDUના બે-બે સાંસદો નવી મોદી સરકારમાં મંત્રી બની શકે છે. જ્યોતિરાદિત્ય સિંધિયા સહિત અનેક દિગ્ગજ નેતાઓના નામ સંભવિત મંત્રીઓમાં સામેલ છે.
ભાજપના સૂત્રોનું કહેવું છે કે નવી સરકારમાં ભાજપનો દબદબો રહે તેવી પ્રબળ શક્યતા છે એટલે કે પૂર્ણ બહુમતી ન હોવા છતાં મોટાભાગના મંત્રીઓ ભાજપના જ રહેશે. જોકે આ સસ્પેન્સ કેબિનેટની જાહેરાત સાથે ખુલશે. મોદી 3.0ની કેબિનેટમાં આવા સાંસદનું નામ પણ સામે આવી રહ્યું છે જે 2024ની લોકસભા ચૂંટણીમાં સૌથી અમીર સાંસદ છે. તેમની સંપત્તિ 5700 કરોડ રૂપિયાથી વધુ છે.
અમે વાત કરી રહ્યા છીએ તેલુગુ દેશમ પાર્ટીના નવા ચૂંટાયેલા સાંસદ ચંદ્ર શેખર પેમ્માસાનીની. પેમ્માસાની 2024ની લોકસભા ચૂંટણી જીતનાર સૌથી ધનિક સાંસદ છે. સૂત્રોનું કહેવું છે કે નવી મોદી સરકારમાં પેમ્માસાનીને રાજ્યમંત્રી તરીકે સ્થાન મળી શકે છે. પેમ્માસાની આંધ્ર પ્રદેશના ગુંટુર વિસ્તારમાંથી ચૂંટણી જીતીને સંસદ પહોંચ્યા હતા. તેમણે 2024ની લોકસભા ચૂંટણીમાં YSRCPના તેમના નજીકના હરીફ કિલારી વેંકટા રોસૈયાને 3.4 લાખથી વધુ મતોથી હરાવ્યા હતા.
TDPનો દાવો- મોદી કેબિનેટનો હિસ્સો હશે
ટીડીપી નેતા જયદેવ ગલ્લાના જણાવ્યા અનુસાર, પેમ્માસાની મોદી 3.0 કેબિનેટમાં રાજ્ય મંત્રી બની શકે છે. તેઓ રવિવારે સાંજે રાષ્ટ્રપતિ ભવનમાં પીએમ મોદી સાથે શપથ લે તેવી શક્યતા છે. ગલ્લાનું કહેવું છે કે તેમના સિવાય અન્ય TDP સાંસદ રામ મોહન નાયડુ કિંજરાપુ કેન્દ્રીય મંત્રી તરીકે શપથ લઈ શકે છે.
કોણ છે TDP સાંસદ ચંદ્ર શેખર પેમ્માસાની?
આંધ્રપ્રદેશના ગુંટુરના બુરીપાલેમ ગામમાં જન્મેલા ચંદ્ર શેખર પેમ્માસાનીએ ઓસ્માનિયા યુનિવર્સિટીમાંથી એમબીબીએસનો અભ્યાસ કર્યો છે. તેમણે જોન્સ હોપકિન્સ યુનિવર્સિટી-સિનાઈ હોસ્પિટલમાં ફિઝિશિયન તરીકે પાંચ વર્ષ સુધી સેવા આપી હતી.
48 વર્ષીય પેમ્માસાની Uworldના સ્થાપક અને CEO પણ છે. આ સિવાય તે TDP NRI સેલમાં પણ સક્રિય રહ્યો છે. પેમ્માસાનીએ 2020માં યુ.એસ.માં યુવા ઉદ્યોગસાહસિક તરીકે અર્ન્સ્ટ એન્ડ યંગ એવોર્ડ જીત્યો હતો. તેમણે પેમ્માસાની ફાઉન્ડેશનની પણ સ્થાપના કરી હતી. તેઓ બે વખતના સાંસદ જયદેવ ગલ્લાના સ્થાને ગુંટુર લોકસભા બેઠક પરથી ચૂંટણી લડ્યા હતા. ચૂંટણી એફિડેવિટ્સ અનુસાર, 2024ની સામાન્ય ચૂંટણી લડનારા 8,360 ઉમેદવારોમાં પેમ્માસાની પાસે સૌથી વધુ સંપત્તિ હતી.
