Supreme Court : સુપ્રીમ કોર્ટે સોમવારે દિલ્હી સરકારને ઠપકો આપ્યો હતો અને જળ સંકટ સંબંધિત અરજીમાં ખામીઓને દૂર ન કરવા પર નારાજગી વ્યક્ત કરી હતી. દિલ્હી સરકારે સુપ્રીમ કોર્ટમાં અરજી દાખલ કરીને માગણી કરી છે કે હરિયાણા સરકારને હિમાચલ પ્રદેશમાંથી મળતું વધારાનું પાણી રાષ્ટ્રીય રાજધાની દિલ્હી માટે છોડવાની સૂચના આપવામાં આવે જેથી કરીને દિલ્હીમાં જળ સંકટનો સામનો કરી શકાય.
રજિસ્ટ્રી વિભાગે એફિડેવિટ સ્વીકારવાનો ઇનકાર કર્યો હતો
સુનાવણી દરમિયાન, જસ્ટિસ પ્રશાંત કુમાર મિશ્રા અને જસ્ટિસ પ્રસન્ના બી વરાલેની વેકેશન બેંચને જાણવા મળ્યું કે સુપ્રીમ કોર્ટના રજિસ્ટ્રી વિભાગે એફિડેવિટ સ્વીકારવાનો ઇનકાર કરી દીધો છે કારણ કે દિલ્હી સરકારે તેની અરજીમાં રહેલી ખામીઓને હજુ સુધી દૂર કરી નથી.
આના પર બેન્ચે નારાજગી વ્યક્ત કરી અને દિલ્હી સરકારને ફટકાર લગાવતા કહ્યું કે, ‘તમે હજુ સુધી અરજીની ખામીઓ દૂર કરી નથી? અમે તમારી અરજી ફગાવી દઈશું. આ વાત છેલ્લી સુનાવણીમાં પણ કહેવામાં આવી હતી, પરંતુ તેમ છતાં તમે ભૂલો સુધારી ન હતી. તમે કોર્ટની કાર્યવાહીને હળવાશથી લઈ શકતા નથી, પછી ભલે તમારો કેસ ગમે તેટલો મહત્વપૂર્ણ હોય.
સુપ્રીમ કોર્ટ 12 જૂને સુનાવણી કરશે
‘અમને હળવાશથી ન લો. અમે ફાઇલ કરેલા દસ્તાવેજો સ્વીકારતા નથી. તમે કોઈ પણ દસ્તાવેજ સીધા કોર્ટમાં જમા કરાવો અને પછી તમે કહો કે તમારી પાસે પાણીની અછત છે અને આજે જ ઓર્ડર પાસ કરો. તમે ઝડપી કાર્યવાહી કરવા માંગો છો, પરંતુ તમે આરામથી બેઠા છો. બધું રેકોર્ડ પર રહેવા દો. આ વાત આપણે આવતીકાલે સાંભળીશું.
આમ કહીને સુપ્રીમ કોર્ટની બેન્ચે કેસની સુનાવણી 12 જૂન સુધી ટાળી દીધી છે. બેન્ચે એમ પણ કહ્યું કે ‘તે પહેલા કેસની ફાઈલો વાંચવા માંગે છે કારણ કે અખબારોમાં આ કેસ પર ઘણું લખાઈ રહ્યું છે. ખંડપીઠે કહ્યું કે જો અમે ફાઈલો નહીં વાંચીએ તો અખબારોના અહેવાલથી પણ પ્રભાવિત થઈ શકીએ છીએ. આ બંને પક્ષો માટે સારું નથી.
