દક્ષિણ ચીન સાગરમાં ચાલી રહેલા તણાવ વચ્ચે ચીને DF-41 ઇન્ટરકોન્ટિનેન્ટલ મિસાઇલનું પરીક્ષણ કર્યું છે જે અમેરિકામાં તબાહી મચાવી શકે છે. ચીનની આર્મી PLAએ બુધવારે સવારે આ મિસાઈલનું પરીક્ષણ કર્યું હતું. ચીની મીડિયાએ રક્ષા મંત્રાલયને ટાંકીને કહ્યું કે, આ 44 વર્ષ પછી બન્યું છે જ્યારે ચીની સેનાએ ખુલ્લેઆમ ઇન્ટરકોન્ટિનેન્ટલ મિસાઇલનું પરીક્ષણ કર્યું છે. આ ન્યુક્લિયર મિસાઈલ તાઈવાન, ફિલિપાઈન્સ અને અમેરિકન નેવલ બેઝ ગુઆમ નજીકથી પસાર થઈને પેસિફિક મહાસાગરમાં પડી હતી. આ મિસાઈલની અંદર એક ડમી પેલોડ લોડ કરવામાં આવ્યો હતો. ચીનની આ DF-41 મિસાઈલને વર્ષ 2017માં સેનામાં સામેલ કરવામાં આવી હતી અને તેની રેન્જ 12 હજારથી 15 હજાર કિમી સુધીની છે.
આ સાથે, આ નવીનતમ ચીની મિસાઇલ અમેરિકન મેઇનલેન્ડની અંદર તબાહી મચાવવાની શક્તિ ધરાવે છે. ઇન્ટરકોન્ટિનેન્ટલ મિસાઇલ સામાન્ય રીતે 5500 કિમી સુધીની રેન્જ ધરાવે છે અને તે પરમાણુ હથિયાર વહન કરવા માટે ડિઝાઇન કરવામાં આવી છે. ચીનના સંરક્ષણ મંત્રાલયે કહ્યું કે પીએલએલના રોકેટ ફોર્સે આ મિસાઈલનું સફળ પરીક્ષણ કર્યું છે. આ મિસાઈલ ચોક્કસ રીતે પૂર્વ નિર્ધારિત વિસ્તારમાં સમુદ્રમાં પડી હતી. ચીનના સંરક્ષણ મંત્રાલયે કહ્યું, ‘આ મિસાઈલ પરીક્ષણ પીએલએની વાર્ષિક સૈન્ય તાલીમ હેઠળની સામાન્ય વ્યવસ્થા છે. આમાં, શસ્ત્રોની કામગીરી અને સૈનિકોની તાલીમનું અસરકારક પરીક્ષણ કરવામાં આવ્યું હતું.
ચીને પ્રથમ વખત ICBM ક્યારે છોડ્યું?
ચીનના સંરક્ષણ મંત્રાલયે કહ્યું કે આ પરીક્ષણનો હેતુ સફળ રહ્યો છે. ચીને આ અંગે તમામ પક્ષોને જાણ કરી હતી. 44 વર્ષોમાં આ પ્રથમ વખત છે જ્યારે ચીને સમુદ્ર પર આંતરખંડીય મિસાઈલનું વાતાવરણીય પરીક્ષણ કર્યું છે. અગાઉ મે 1980માં ચીને ડીએફ-5નું પરીક્ષણ કર્યું હતું. ચીનની આ પ્રથમ ઇન્ટરકોન્ટિનેન્ટલ મિસાઇલની રેન્જ 9 હજાર કિમી સુધીની હતી. ચીને આ મિસાઈલનું પરીક્ષણ એવા સમયે કર્યું છે જ્યારે સમગ્ર એશિયા પેસિફિક ક્ષેત્રમાં મિસાઈલ સંબંધિત ગતિવિધિઓમાં જોરદાર વધારો થયો છે. આ પહેલા ઉત્તર કોરિયાએ ટૂંકા અંતરની મિસાઈલનું પરીક્ષણ કર્યું હતું. આ મિસાઈલ જાપાન નજીક સમુદ્રમાં પડી હતી.
એપ્રિલ મહિનામાં અમેરિકાએ ફિલિપાઈન્સની નજીક તેની મધ્યમ અંતરની મિસાઈલ તૈનાત કરી હતી. 1987 પછી આ પ્રથમ વખત છે જ્યારે અમેરિકાએ એશિયા પેસિફિક ક્ષેત્રમાં મધ્યમ અંતરની મિસાઈલ તૈનાત કરી છે. અમેરિકાએ 2019માં INF સંધિમાંથી ખસી ગયું હતું અને આરોપ લગાવ્યો હતો કે રશિયા આ કરારનું ઉલ્લંઘન કરી રહ્યું છે. યુએસ ડિફેન્સ ડિપાર્ટમેન્ટનું કહેવું છે કે ચીનનું મિલિટરી રોકેટ ફોર્સ તેની વ્યૂહાત્મક ડિટરન્સ ક્ષમતાને આધુનિક બનાવી રહ્યું છે, જેમાં નવી ઇન્ટરકોન્ટિનેન્ટલ મિસાઇલનો વિકાસ સામેલ છે.
