ઈન્ટરનેશનલ ક્રિમિનલ કોર્ટ (ICC) એ ઈઝરાયેલના વડાપ્રધાન બેન્જામિન નેતન્યાહુ વિરુદ્ધ યુદ્ધ અપરાધો અને માનવતા વિરુદ્ધના અપરાધોના આરોપસર ધરપકડ વોરંટ જારી કર્યું છે. પ્રથમ વખત ઈન્ટરનેશનલ ક્રિમિનલ કોર્ટે ઈઝરાયેલના કોઈ વરિષ્ઠ અધિકારી વિરુદ્ધ આ પ્રકારની કાર્યવાહી કરી છે. આ નિર્ણયના થોડા કલાકો બાદ જ બેન્જામિન નેતન્યાહુએ પ્રતિક્રિયા આપતા કહ્યું કે આઈસીસીનો આ નિર્ણય યહૂદી વિરોધી છે.
બેન્જામિન નેતન્યાહુએ એક વીડિયો સંદેશ જાહેર કરતા કહ્યું કે, હેગની ઈન્ટરનેશનલ ક્રિમિનલ કોર્ટનો આ યહૂદી વિરોધી ચુકાદો આધુનિક ડ્રેફસ ટ્રાયલ જેવો છે. તેનો અંત પણ એવો જ હશે. તમને જણાવી દઈએ કે ડ્રાયફસ ટ્રાયલ 1894માં ફ્રેંચ મિલિટ્રીના એક યહૂદી સૈન્ય અધિકારી વિરુદ્ધ ચલાવવામાં આવેલ કેસ હતો. એવું કહેવાય છે કે રાજકીય ભ્રષ્ટાચારના કારણે તેમને આજીવન કેદની સજા થઈ હતી. લશ્કરી અધિકારી પર ફ્રેન્ચ સૈન્યના ગુપ્ત દસ્તાવેજો લીક કરવાનો આરોપ હતો. પાછળથી તે નિર્દોષ જણાયો અને ફરીથી ફ્રેન્ચ સૈન્યમાં અધિકારી બન્યો.
ICCએ પીએમ બેન્જામિન નેતન્યાહુ અને સંરક્ષણ પ્રધાન યોવ ગેલન્ટ પર માનવતા વિરુદ્ધ અપરાધો, હત્યા, ત્રાસ અને અમાનવીય પ્રવૃત્તિઓનો આરોપ લગાવ્યો છે. કોર્ટે કહ્યું છે કે ભૂખમરાને પણ યુદ્ધનું હથિયાર બનાવી દેવામાં આવ્યું છે. નેતન્યાહુએ કહ્યું, ફ્રાન્સના ન્યાયાધીશની અધ્યક્ષતાવાળી અદાલતે ફરી એકવાર ભૂલ કરી છે. કોર્ટ ખોટા આક્ષેપો કરી રહી છે. આ બધું ત્યારે થઈ રહ્યું છે જ્યારે અમે અમારા શ્રેષ્ઠ પ્રયાસો કરીએ છીએ કે સામાન્ય નાગરિકોને કોઈ સમસ્યાનો સામનો કરવો ન પડે.
અમેરિકી રાષ્ટ્રપતિ જો બિડેને પણ ફરિયાદીની નિંદા કરી હતી અને હમાસ સામે પોતાનો બચાવ કરવાના ઇઝરાયેલના અધિકારને સમર્થન આપ્યું હતું. ત્રણ ન્યાયાધીશોની બેન્ચે સર્વસંમતિથી નેતન્યાહુ અને ઇઝરાયલના ભૂતપૂર્વ સંરક્ષણ પ્રધાન યોવ ગાલાંટ સામે વોરંટ જારી કરવાનો નિર્ણય લખ્યો હતો.
ચુકાદામાં કહેવામાં આવ્યું છે કે, ‘કોર્ટને એવું માનવા માટે વાજબી કારણો છે કે બંને વ્યક્તિઓએ ગાઝામાં નાગરિકોને તેમના જીવન ટકાવી રાખવા માટે જરૂરી ચીજવસ્તુઓથી વંચિત રાખ્યા છે, જેમાં ખોરાક, પાણી અને દવા અને ઈંધણનો સમાવેશ થાય છે.’
કોર્ટે હમાસના એક નેતા મોહમ્મદ ડેઇફની ધરપકડ માટે વોરંટ પણ જારી કર્યું છે. આઈસીસીના મુખ્ય ફરિયાદીએ હમાસના અન્ય બે વરિષ્ઠ નેતાઓ, યાહ્યા સિનવર અને ઈસ્માઈલ હાનિયા માટે પણ વોરંટની વિનંતી કરી હતી, પરંતુ તેઓ બંને અથડામણમાં માર્યા ગયા હતા. વોરંટ હોવા છતાં, કોઈ પણ શકમંદ નજીકના ભવિષ્યમાં હેગમાં ન્યાયાધીશો સમક્ષ હાજર થાય તેવી શક્યતા નથી. કોર્ટ પાસે વોરંટ લાગુ કરવા માટે કોઈ પોલીસ નથી, તેના બદલે તેના સભ્ય દેશોના સહકાર પર આધાર રાખે છે.
ધરપકડની ધમકી નેતન્યાહુ અને ગેલેન્ટ માટે વિદેશ પ્રવાસ મુશ્કેલ બનાવી શકે છે. જો કે, રશિયન પ્રમુખ વ્લાદિમીર પુતિન, યુક્રેનમાં કથિત યુદ્ધ અપરાધો માટે ICC વોરંટ પર વોન્ટેડ છે, તાજેતરમાં જ કોર્ટના સભ્ય દેશોમાંના એક મંગોલિયાનો પ્રવાસ કર્યો હતો, જોકે તેની ધરપકડ કરવામાં આવી ન હતી.
