રોહિત શર્માના ટેસ્ટમાંથી નિવૃત્તિ બાદ, આ ફોર્મેટમાં નવા કેપ્ટનને લઈને એક નવી ચર્ચા શરૂ થઈ ગઈ છે. રોહિતના ઉત્તરાધિકારી માટે ફક્ત એક નહીં પરંતુ ચાર નામોની ચર્ચા થઈ રહી છે. આમાં શુભમન ગિલ અને ઋષભ પંતના નામ સૌથી વધુ ચર્ચામાં છે. એવું માનવામાં આવે છે કે શુભમન ગિલનું નામ લગભગ નક્કી છે, પરંતુ કેપ્ટનશીપની રેસમાં રહેલા જસપ્રીત બુમરાહ અને રવિન્દ્ર જાડેજાના નામ પર પણ વિચારણા કરવામાં આવી રહી છે.
સુનીલ ગાવસ્કર, રવિચંદ્રન અશ્વિન અને સંજય માંજરેકર જેવા દિગ્ગજ ખેલાડીઓ જસપ્રીત બુમરાહને ટેસ્ટ કેપ્ટન તરીકે જોવા માંગે છે, પરંતુ ટીમ ઈન્ડિયાના ભૂતપૂર્વ કોચ રવિ શાસ્ત્રીનો મત અલગ છે. રવિ શાસ્ત્રીએ ICC સમીક્ષામાં કહ્યું હતું કે ભારતીય ટીમને હવે નવો અભિગમ અપનાવવાની જરૂર છે. આવી સ્થિતિમાં, ભવિષ્યને ધ્યાનમાં રાખીને ટીમના કેપ્ટનની પસંદગી કરવી જોઈએ.
રવિ શાસ્ત્રી શુભમનને કેપ્ટન તરીકે જોવા માંગે છે
ICC સમીક્ષા પર વાત કરતા, રવિ શાસ્ત્રીએ ટેસ્ટ કેપ્ટનશીપ અંગે ચાલી રહેલી ચર્ચા પર પોતાનો અભિપ્રાય આપ્યો છે. તેમણે ઝડપી બોલર જસપ્રીત બુમરાહ પર કેપ્ટનશીપનો બોજ ન નાખવાની સલાહ આપી અને શુભમન ગિલ અને ઋષભ પંત જેવા યુવા ખેલાડીઓને તક આપવા કહ્યું, જેમની પાસે ભવિષ્યમાં ટીમનું નેતૃત્વ કરવાની ક્ષમતા છે.
તેણે કહ્યું, ‘મારા માટે ઓસ્ટ્રેલિયા પછી જસપ્રીત સ્વાભાવિક પસંદગી હોત, પરંતુ હું નથી ઇચ્છતો કે જસપ્રીતને કેપ્ટન બનાવવામાં આવે અને પછી તમે તેને બોલર તરીકે ગુમાવો.’ રવિ શાસ્ત્રીએ સિડનીમાં બોર્ડર-ગાવસ્કર ટ્રોફીની છેલ્લી મેચમાં બુમરાહની પીઠની ઇજાનો પણ ઉલ્લેખ કર્યો. આ ઈજાને કારણે, તે લગભગ ત્રણ મહિના સુધી ટીમની બહાર રહ્યો અને ICC ચેમ્પિયન્સ ટ્રોફી 2025 માં ભારતની જીતમાં પણ રમી શક્યો નહીં.
