પંજાબના મોહાલીમાંથી એક ભયાનક ઘટના સામે આવી ઓફિસમાં કામ કરતી પૂર્વ પ્રેમિકા પર તીક્ષ્ણ હથિયાર લઈને તૂટી પડ્યો હેરી યુવતી પોતાનો જીવ બચાવવા માટે ભાગી પણ યુવકે ગેટ પાસે તેને પકડી લીધી અને તેને ઉપરાં ઉપરી ઘા માર્યા પંજાબના મોહાલીમાંથી એક ભયાનક ઘટના સામે આવી છે. જ્યાં એક પ્રાઈવેટ કંપનીમાં કામ કરતી યુવતીની તેની ઓફિસમાં જ તેના પૂર્વ પ્રેમીએ કરપીણ હત્યા કરી છે.
ડિમ્પલ નામની યુવતી જ્યારે ઓફિસમાં કામ કરી રહી હતી, જ્યારે સાથે ઓફિસમાં કામ કરતો તેનો પૂર્વ પ્રેમી હરવિંદર ઉર્ફે હેરી પાછળથી આવ્યો અને ડિમ્પલ પર તીક્ષ્ણ હથિયાર લઈને તૂટી પડ્યો, તેણે ડિમ્પલને તીક્ષ્ણ હથિયારના ઘા ઝીંક્યા બાદ પોતાનું ગળુ કાપીને આપઘાત કરવાનો પ્રયાસ કર્યો, પણ તેને સફળતા મળી નહીં. આ હુમલાનો સીસીટીવી વીડિયો પણ સામે આવ્યો છે.
આ ઘટના બાદ બંનેને ગંભીર હાલતમાં હોસ્પિટલમાં દાખલ કરવામાં આવ્યા હતા, જ્યાં પટિયાલાની રહેવાસી ડિમ્પલનું મોત થયું હતું. જ્યારે આરોપી હરવિંદર માન ઉર્ફે હેરીની હાલત નાજુક હોય તેવું કહેવામાં આવી રહ્યું છે. પોલીસ દ્વારા સમગ્ર મામલાની તપાસ કરવામાં આવી રહી છે. પોલીસે હત્યાનો ગુનો નોંધીની તપાસ શરૂ કરી દીધી છે.
પોલીસની પ્રાથમિક તપાસમાં સામે આવ્યું છે કે ડિમ્પલ અને હેરી બંને એક પ્રાઈવેટ કંપનીમાં કામ કરતા હતા. આ કંપની પેકર્સ એન્ડ મૂવર્સનું કામ કરે છે. લગભગ ત્રણ વર્ષથી બંને સાથે કામ કરતા હતા. આ દરમિયાન બંને વચ્ચે મિત્રતા થઈ અને પછી પ્રેમ સંબંધ પણ થયો. જાેકે, થોડા સમય પહેલા બંનેનું બ્રેકઅપ થઈ ગયું હતું. ત્યારથી હેરી ડિમ્પલથી નારાજ હતો. આ કારણે જ તેણે ડિમ્પલની કરપીણ હત્યા કરી.
એવું પણ કહેવામાં આવી રહ્યું છે કે, બ્રેકઅપ પછી હેરી અંદરથી ખૂબ જ તૂટી ગયો હતો અને માનસિક રીતે પરેશાન રહેતો હતો. તેણે ડિમ્પલ સાથે ફરીથી સંબંધ સુધારવાનો પ્રયાસ કર્યો હતો, પણ વાત બની નહોતી. આથી તે વધુ પરેશાન થઈ ગયો હતો અને તેણે આવેશમાં આવીને આવું પગલું ભરી લીધું.
