લાલપુરના મેઘપર પંથકમાંથી વધુ એક બોગસ.તબીબ એસ.ઓ.જી.ના હાથે પકડાયો.પરપ્રાંતીય શખ્સ પોતે દવાખાનું ચલાવી રહ્યો હોવાનું અને દર્દીઓની તપાસ કરતાં મળી આવ્યો હતો.
જામનગર જિલ્લાના લાલપુર તાલુકાના મેઘપર ગામમાં ગરીબોની વસાહતની વચ્ચે એક તબિબ કે જેની પાસે કોઈપણ પ્રકારની ડીગ્રી ન હોવા છતાં ગરીબ દર્દીઓના આરોગ્ય સાથે ચેડાં કરી રહ્યો છે, તેવી માહિતી એસ.ઓ.જી. શાખાને મળી હતી. તેથી ગઈકાલે મોડી સાંજે દરોડો પાડ્યો હતો. જે દરોડા દરમિયાન શ્રીમંતા પશુપતિ વિશ્વાસ નામનો પરપ્રાંતીય શખ્સ પોતે દવાખાનું ચલાવી રહ્યો હોવાનું અને દર્દીઓની તપાસ કરતાં મળી આવ્યો હતો. એસ.ઓ.જી. ની ટુકડીએ તેની પાસેથી ડીગ્રી વગેરેની માંગણી કરતાં પોતાની પાસે કોઈ પણ પ્રકારની ડીગ્રી ન હોવાનું જણાવ્યું હતું. જેથી તેની અટકાયત કરી લઈ તેના દવાખાનામાંથી રૂપિયા ૪,૨૬૫ની કિંમતનો દવા સહિતનો મુદ્દામાલ કબજે કરી લેવામાં આવ્યો છે.જેની સામે મેઘપર પોલીસ મથકમાં મેડિકલ પ્રેક્ટિસનર્સ એકટ ૧૯૬૩ ની કલમ ૩૦ તથા બી.એન.એસ. કલમ ૧૨૫ મુજબ ગુનો દાખલ કરાવ્યો છે.
