ડોનાલ્ડ ટ્રમ્પે મસ્ક અને સત્યા નદેલા સહિત ૬ ટેક દિગ્ગજોને સર્વોચ્ચ વિજ્ઞાની સન્માનથી નવાજ્યા

મસ્કને આધુનિક યુગના થોમસ એડિસન ગણાવ્યા ડોનાલ્ડ ટ્રમ્પે સત્ય નદેલા સહિત ૬ ટેક દિગ્ગજાેને સર્વોચ્ચ વિજ્ઞાની સન્માન આપ્યું ઇલોન મસ્કને નેશનલ મેડલ ઓફ સાયન્સ અને સત્યા નદેલાને નેશનલ મેડલ ઓફ ટેકનોલોજી એન્ડ ઇનોવેશન એનાયત કરાયો
અમેરિકન પ્રમુખ ડોનાલ્ડ ટ્રમ્પે ગુરુવારે વોશિંગ્ટન સ્થિત યુએસ ઇન્સ્ટિટ્યુટ ઓફ પીસમાં યોજાયેલી ‘અ ન્યૂ ગોલ્ડન એજ‘ સમિટ દરમિયાન માઇક્રોસોફ્ટના સીઈઓ સત્ય નદેલા અને ટેસ્લા-સ્પેસ એક્સના સીઈઓ ઇલોન મસ્ક સહિત વિશ્વના અનેક દિગ્ગજ ટેક લિડર્સને દેશના સર્વોચ્ચ વૈજ્ઞાનિક સન્માનથી નવાજ્યા હતા. આ કાર્યક્રમ વિજ્ઞાન અને આર્ટિફિશિયલ ઇન્ટેલિજન્સ (AI) ના વિકાસને ઝડપી બનાવનારા સાહસિકોના પ્રદાનને બિરદાવવા માટે યોજાયો હતો. આ ભવ્ય સમારોહમાં ટેકનોલોજી અને વિજ્ઞાન જગતના અગ્રણીઓને બે મુખ્ય શ્રેણીઓમાં સન્માનિત કરવામાં આવ્યા: નેશનલ મેડલ ઓફ સાયન્સ: ઇલોન મસ્ક (ટેસ્લા અને સ્પેસએક્સના સીઈઓ), સર્ગેઈ બ્રિન (ગૂગલના સહ-સંસ્થાપક), જેન્સન હુઆંગ (એનવીડિયાના સીઈઓ) અને લિસા સૂ (એએમડીની સીઈઓ).
નેશનલ મેડલ ઓફ ટેકનોલોજી એન્ડ ઇનોવેશન: સત્ય નદેલા (માઇક્રોસોફ્ટના સીઈઓ અને ચેરમેન) અને માઈકલ ડેલ (ડેલના સંસ્થાપક).
આ પ્રસંગે પ્રમુખ ટ્રમ્પે ઇલોન મસ્કની પ્રશંસા કરતા તેમને રાષ્ટ્રીય ધરોહર ગણાવ્યા હતા. તેમણે મસ્કની સરખામણી પ્રખ્યાત અમેરિકી શોધક થોમસ એડિસન સાથે કરતા કહ્યું કે, “ઇલોન આપણા આધુનિક યુગના થોમસ એડિસન છે.” ટ્રમ્પે તમામ વિજેતાઓને સંબોધતા જણાવ્યું કે તેઓ ઇતિહાસના પૃષ્ઠોમાં મહાનુભાવો તરીકે નોંધાશે અને આ પ્રતિભાશાળી લોકોના સહયોગથી અમેરિકા હંમેશા ટેકનોલોજી ક્ષેત્રે નંબર-વન રહેશે.
આ શિખર સંમેલન એવા સમયે યોજાયું છે જ્યારે ટ્રમ્પ વહીવટીતંત્ર આર્ટિફિશિયલ ઇન્ટેલિજન્સ અને ‘સુપર ઇન્ટેલિજન્સ‘ ના વિકાસને સતત પ્રોત્સાહન આપી રહ્યું છે. આ કાર્યક્રમમાં વ્હાઇટ હાઉસ ઓફિસ ઓફ સાયન્સ એન્ડ ટેકનોલોજી પોલિસીના ડિરેક્ટર માઈકલ ક્રેટ્સિઓસ પણ વિશેષરૂપે ઉપસ્થિત રહ્યા હતા.