ક્રૂડ ઓઇલના ભાવમાં થયો મોટો ઘટાડો, શું પેટ્રોલ અને ડીઝલ સસ્તું થશે?

ભાવમાં કેટલો ઘટાડો થયો?

ઓપેક પહેલા જ 2024 અને 2025માં તેલનો પુરવઠો ઘટાડવાની જાહેરાત કરી ચૂક્યું છે. આવી સ્થિતિમાં ઈરાન-ઈઝરાયલ યુદ્ધના કારણે ક્રૂડ ઓઈલના ભાવમાં ભારે વધારો જોવા મળ્યો હતો. જો કે તેલના ભાવમાં 3 ટકાનો ઘટાડો થયો છે. સોમવારે કાચા તેલની કિંમતમાં 2 ટકાનો ઘટાડો થયો હતો, જ્યારે મંગળવારે સવારે તે વધીને 3 ટકા થયો હતો. બપોરે 01.27 વાગ્યા સુધીમાં બ્રેન્ટ ક્રૂડ ઓઈલની કિંમત $2.27 ઘટીને $75.19 પ્રતિ બેરલ થઈ ગઈ છે. જ્યારે યુએસ વેસ્ટ ટેક્સાસ ઈન્ટરમીડિયેટ $2.22 ઘટીને $71.60 પ્રતિ બેરલ થઈ ગયું છે. એકંદર આંકડાની વાત કરીએ તો આ સપ્તાહે તેલની કિંમતમાં 4 ડોલર એટલે કે 336 રૂપિયાનો ઘટાડો થયો છે.

ભાવ કેમ વધ્યા?

ઈરાનના મિસાઈલ હુમલા બાદ ઈઝરાયેલ જવાબી કાર્યવાહી કરવાની તૈયારી કરી રહ્યું હતું. આવી સ્થિતિમાં ઘણા લોકોને ડર હતો કે ઈઝરાયેલ ઈરાનના તેલના કુવાઓને નિશાન બનાવી શકે છે. આ અંગે આરબ દેશોએ ઈઝરાયેલને કડક ચેતવણી પણ આપી હતી. સાથે જ અમેરિકાએ પણ મર્યાદિત હુમલા કરવાની સલાહ આપી હતી. આવી સ્થિતિમાં વધી રહેલા આંતરરાષ્ટ્રીય દબાણને કારણે ઈઝરાયેલે સ્પષ્ટ કર્યું છે કે તે ઈરાનના તેલના કુવાઓ પર હુમલો નહીં કરે. જેના કારણે હવે તેલના સપ્લાયમાં કોઈ અડચણ નહીં આવે તેવી અટકળો લગાવવામાં આવી રહી છે.

ઈઝરાયેલે શું કહ્યું?

મીડિયા રિપોર્ટ્સ અનુસાર ઈઝરાયેલના વડાપ્રધાન બેન્જામિન નેતન્યાહુએ અમેરિકાને કહ્યું છે કે ઈઝરાયેલ ઈરાનના સૈન્ય ઠેકાણા પર હુમલો કરવાની યોજના તૈયાર કરી રહ્યું છે. ઈઝરાયેલનું નિશાન ઈરાનના પરમાણુ સ્થળો અને તેલના કુવાઓ પર બિલકુલ નથી. વોશિંગ્ટન પોસ્ટના આ અહેવાલ બાદ બધાએ રાહતનો શ્વાસ લીધો હતો.