ન્યુઝીલેન્ડ અને ઈંગ્લેન્ડ વચ્ચેની ત્રણ મેચની ટેસ્ટ સીરીઝ સમાપ્ત થઈ ગઈ છે. યજમાન ન્યૂઝીલેન્ડે શ્રેણીની છેલ્લી મેચ 423 રનના વિશાળ અંતરથી જીતી હતી. જોકે, ઈંગ્લેન્ડે શ્રેણી પર કબજો જમાવ્યો છે, કારણ કે ઈંગ્લેન્ડે પ્રથમ બે મેચ જીતી હતી. આ રીતે આ સિરીઝ ઈંગ્લેન્ડમાં 2-1 થી ગઈ. આ મેચ ટિમ સાઉથીની છેલ્લી ટેસ્ટ મેચ હતી. આ મેચમાં તેણે 2 વિકેટ ઝડપી હતી. ન્યૂઝીલેન્ડે બીજી વખત ટેસ્ટ મેચ 423 રને જીતી છે. રનની દ્રષ્ટિએ ન્યૂઝીલેન્ડની આ સંયુક્ત સૌથી મોટી જીત છે. હેરી બ્રુકને શ્રેણીમાં તેના સારા પ્રદર્શન માટે પ્લેયર ઓફ ધ સિરીઝ જાહેર કરવામાં આવ્યો હતો, જ્યારે મિચેલ સેન્ટનરને તેના ઓલરાઉન્ડ પ્રદર્શન માટે પ્લેયર ઓફ ધ મેચનો એવોર્ડ મળ્યો હતો.
આ મેચની વાત કરીએ તો ઈંગ્લેન્ડની ટીમના કેપ્ટન બેન સ્ટોક્સે ટોસ જીતીને બોલિંગ પસંદ કરી હતી. આવી સ્થિતિમાં ન્યૂઝીલેન્ડે પ્રથમ દાવમાં 347 રન બનાવ્યા હતા જેમાં મિશેલ સેન્ટનરના 76 રન, ટોમ લાથમના 63 રન અને કેન વિલિયમસનના 44 રન સામેલ હતા. ઈંગ્લેન્ડ તરફથી મેથ્યુ પોટ્સને 4 વિકેટ મળી હતી. આ પછી ઈંગ્લેન્ડની બેટિંગ આવી અને ટીમ 143 રનમાં સમેટાઈ ગઈ. મેટ હેનરીએ 4 અને વિલ ઓ’રર્કે અને મિશેલ સેન્ટનરને 3-3 વિકેટ મળી હતી. આ ઈનિંગમાં કોઈ પણ ઈંગ્લિશ ખેલાડી 40નો આંકડો પણ પાર કરી શક્યો નહોતો. 204 રનની લીડ હોવા છતાં ન્યુઝીલેન્ડે ઈંગ્લેન્ડને ફોલોઓન પણ ન આપ્યું.
ન્યુઝીલેન્ડની ટીમ બીજા દાવમાં બેટિંગ કરવા ઉતરી હતી. કેન વિલિયમસને જોરદાર સદી ફટકારી હતી. તે 156 રન બનાવીને આઉટ થયો હતો. વિલ યંગ અને ડેરીલ મિશેલે 60-60 રન બનાવ્યા હતા. સેન્ટનરે 49 રન બનાવ્યા અને રચિન રવિન્દ્ર અને ટોમ બ્લંડેલે 44 રનની ઇનિંગ્સ રમી. આ ઇનિંગમાં ન્યૂઝીલેન્ડે કુલ 453 રન બનાવ્યા હતા. આ રીતે ઈંગ્લેન્ડને 658 રનનો વિશાળ લક્ષ્યાંક મળ્યો હતો. જવાબમાં ઈંગ્લિશ ટીમ 234 રન બનાવીને પડી ભાંગી હતી. આ રીતે કિવી ટીમે 423 રનના માર્જિનથી જીત મેળવી હતી. ઇંગ્લેન્ડ માટે જેકબ બેથેલે આ ઇનિંગમાં 76 રન બનાવ્યા હતા અને જો રૂટ 54 રન બનાવવામાં સફળ રહ્યો હતો. ન્યુઝીલેન્ડ તરફથી મિશેલ સેન્ટનરને 4 વિકેટ મળી હતી.
