X પર AI-જનરેટ નગ્ન ફોટા: એક કલાકમાં હજારો અપલોડ, ઇલોન મસ્ક પર વૈશ્વિક દબાણ

યુરોપિયન કમિશન હાલમાં દુનિયાભરમાં બાળકોની સેફ્ટીને લઈને ખૂબ જ કામ કરી રહ્યું છે. તેમના દ્વારા xAIને ઓર્ડર આપવામાં આવ્યો છે કે તેઓ ગ્રોકને લઈને તમામ ડોક્યુમેન્ટને સાચવીને રાખે. તેઓ આ માટે કોઈ નવું ઇન્વેસ્ટિગેશન શરૂ નથી કરી રહ્યાં, પરંતુ કંપની પર કોઈ પણ એક્શન લેવા પહેલાં તેમને ચેટબોટના ડેટા સાચવવા માટે કહી દેવામાં આવ્યું છે જેથી ભવિષ્યમાં શું એક્શન લેવું એ નક્કી કરી શકાય. હાલમાં એવી ચર્ચા છે કે ઇલોન મસ્ક નથી ઇચ્છતો કે ગ્રોક દ્વારા ઇમેજ જનરેશન પર કોઈ લગામ લગાવવામાં આવે. આથી તે પર્સનલી વચ્ચે પડીને કંપનીને કોઈ એક્શન લેવા માટે પરવાનગી નથી આપી રહ્યો હોવાની ચર્ચા છે. આ ચર્ચા બાદ યુરોપિયન કમિશન દ્વારા તેમને તમામ ડોક્યુમેન્ટ સાચવીને રાખવા માટે કહી દેવામાં આવ્યું છે. AIની મદદથી બાળકોના અશ્લીલ ફોટો બનાવવા માટે કંપનીએ એની ટીકા કરી છે. આ વિશે કંપનીએ સ્ટેટમેન્ટ આપ્યું કે ‘ગેરકાયદેસરના કન્ટેન્ટને અપલોડ કરનારને જે સજા મળે છે એ જ સજા ગ્રોકને એવા કન્ટેન્ટ બનાવવા માટે કમાન્ડ આપનાર વ્યક્તિને પણ એટલી જ સજા થશે.’ દુનિયાભરના દેશની સરકારી એજન્સી દ્વારા હવે કંપનીને ખૂબ જ સખત ચેતવણી આપવામાં આવી રહી છે. યુનાઇટેડ કિંગડમ દ્વારા હાલમાં xAI સાથે વાતચીત કરવામાં આવી રહી છે. બહુ જલદી તેઓ પણ કંપનીને ઇન્વેસ્ટિગેટ કરવા માટેનો વોરન્ટ મેળવી શકે છે.