અનેક વાહનો દટાયા, જીવ બચાવવા દોડ્યા લોકો શિમલામાં ભયાનક દુર્ઘટના, અચાનક ધસી પડ્યો પહાડ હિમાચલ પ્રદેશના શિમલામાં ઢલી-સંજાેલી બાયપાસ માર્ગ પર ભયાનક ભૂસ્ખલન : વાહનો કાટમાળ નીચે દટાયા
હિમાચલ પ્રદેશના શિમલામાં બુધવારે એક મોટી દુર્ઘટના સામે આવી છે, જ્યાં ઢલી-સંજાેલી બાયપાસ માર્ગ પર અચાનક મોટો પહાડ ધસી પડ્યો હતો. આ ભયાનક ભૂસ્ખલનની લપેટમાં રસ્તા પરથી પસાર થઈ રહેલા વાહનો આવી ગયા હતા અને કાટમાળ નીચે દબાઈ ગયા હતા. આ સમગ્ર ઘટનાનો કંપારી છૂટી જાય તેવો વીડિયો પણ સામે આવ્યો છે, જેમાં સ્થળ પર હાજર લોકો પોતાનો જીવ બચાવવા માટે નાસભાગ કરતા જાેવા મળી રહ્યા છે.
મળતી માહિતી મુજબ, શિમલાના સંજાેલી વિસ્તારમાં આવેલા ઢલી બાયપાસ નજીક આ દુર્ઘટના સર્જાઈ હતી. જે સમયે પહાડ પરથી ભારે માત્રામાં પથ્થરો અને માટી નીચે ધસી પડ્યા, તે વખતે હાઇવે પરથી વાહનો પસાર થઈ રહ્યા હતા. ભૂસ્ખલનની શરૂઆત થતાં જ કેટલાક વાહનચાલકો સમયસૂચકતા વાપરીને પોતાની ગાડીઓ આગળ હંકારી લઈ ગયા હતા, પરંતુ ૧ થી ૨ જેટલી ગાડીઓ સીધી જ કાટમાળની ચપેટમાં આવીને દબાઈ ગઈ હતી.
ઘટનાસ્થળેથી થોડે દૂર ઊભેલી વ્યક્તિએ આ સમગ્ર ઘટનાનો વીડિયો કેમેરામાં કેદ કર્યો હતો. વીડિયોમાં સ્પષ્ટ દેખાય છે કે ધૂળની ડમરીઓ અને પથ્થરોના ધસમસતા પ્રવાહ વચ્ચે રસ્તાની બાજુમાં ઊભેલા રાહદારીઓ પોતાનો જીવ બચાવવા માટે અહીં-તહીં દોડી રહ્યા હતા. અચાનક થયેલા આ લેન્ડસ્લાઇડને કારણે સમગ્ર વિસ્તારમાં ભારે અફરાતફરી અને ભયનો માહોલ સર્જાયો હતો.
