ગુજરાતના ખેડામાં અમદાવાદ-વડોદરા એક્સપ્રેસ હાઈવે પર એક ભયાનક અકસ્માત સર્જાયો હતો. આ અકસ્માતમાં એસિડ ટેન્કર અને ઓઇલ ભરીને જતી ટ્રક અથડાતાં ટ્રક ચાલકનું ઘટનાસ્થળે જ મોત થયું હતું. ટ્રકનો ક્લીનર ગંભીર રીતે ઘાયલ થયો છે. તેમને એમ્બ્યુલન્સ દ્વારા નડિયાદ સિવિલ હોસ્પિટલમાં મોકલવામાં આવ્યા છે.
મળતી માહિતી મુજબ, અમદાવાદ-વડોદરા એક્સપ્રેસ હાઈવે પર નડિયાદ નજીક આ અકસ્માત થયો હતો. અહીં એસિડ ટેન્કર અને ટ્રક વચ્ચે અથડામણ થઈ હતી, જેમાં એક વ્યક્તિનું મોત થયું હતું. એસિડ ભરેલું ટેન્કર પાછળથી ઓઈલ લઈ જતી ટ્રક સાથે અથડાયું હતું, જેના કારણે ટ્રક ચાલકનું ઘટનાસ્થળે જ મોત થયું હતું અને ક્લીનર ટ્રકની કેબિનમાં ફસાઈ ગયો હતો. આ અકસ્માતની જાણ થતાં જ નડિયાદ ફાયર બ્રિગેડની ટીમ ઘટના સ્થળે પહોંચી ગઈ હતી.
ફાયર ફાયટરોની ટીમ ફાયર રેસ્ક્યુ ટેન્ડર વાન સાથે ઘટના સ્થળે પહોંચી હતી. નડિયાદ ફાયર વિભાગની ટીમે હાઇડ્રોલિક સ્પીડર કટર મશીનની મદદથી ટ્રકમાં ફસાયેલા ડ્રાઇવર અને ક્લિનરને બહાર કાઢ્યા હતા. જોકે ટ્રક ચાલકનું ઘટનાસ્થળે જ મોત નીપજ્યું હતું, પરંતુ ટ્રકનો ક્લીનર ગંભીર રીતે ઘાયલ થયો હતો.
આ દરમિયાન એક્સપ્રેસ હાઈવે પર વડોદરાથી અમદાવાદ જતા વાહનો લગભગ એક કલાક સુધી થંભી ગયા હતા. એસિડ ટેન્કરની પાછળ ટ્રકની ટક્કર એટલી જોરદાર હતી કે એસિડ ભરેલા ટેન્કરમાંથી એસિડ લીકેજ થયું હતું. નડિયાદ ફાયર બ્રિગેડની ટીમે ટેન્કરમાંથી એસિડ પાતળું કરવાનું શરૂ કરી તેનું લીકેજ અટકાવ્યું હતું. લગભગ એક કલાકની મહેનત બાદ ટેન્કરમાંથી એસિડ લીકેજ બંધ થયું હતું.
