પંજાબ અને હરિયાણા હાઈકોર્ટના ભૂતપૂર્વ જસ્ટિસ નિર્મલ યાદવને મોટી રાહત મળી છે. શનિવારે સીબીઆઈ કોર્ટે તેમને ૧૫ લાખ રૂપિયાના લાંચ કેસમાં નિર્દોષ જાહેર કર્યા હતા. સીબીઆઈ કોર્ટના સ્પેશિયલ જજ અલકા મલિકે આ ચુકાદો આપ્યો છે. ઉપરાંત, આ કેસમાં તમામ આરોપીઓને નિર્દોષ જાહેર કરવામાં આવ્યા હતા.
સ્પેશિયલ સેન્ટ્રલ બ્યુરો ઓફ ઇન્વેસ્ટિગેશન (CBI) કોર્ટે 2008ના ભ્રષ્ટાચારના કેસમાં પંજાબ અને હરિયાણા હાઇકોર્ટના ભૂતપૂર્વ જસ્ટિસ નિર્મલ યાદવને નિર્દોષ જાહેર કર્યા. ચંદીગઢના જિલ્લા કોર્ટ સંકુલમાં લંચ પછી જજ અલકા મલિકે પોતાનો ચુકાદો સંભળાવ્યો. તમને જણાવી દઈએ કે આ કેસમાં ચંદીગઢ પોલીસે 13 ઓગસ્ટ 2008ના રોજ FIR નોંધી હતી. આ મામલો ખૂબ જ સમાચારમાં રહ્યો હતો.
આ પહેલો કેસ હતો જેમાં કોઈ સેવારત ન્યાયાધીશ સામે ભ્રષ્ટાચારનો કેસ દાખલ કરવામાં આવ્યો હતો. ભૂતપૂર્વ ન્યાયાધીશ નિર્મલ યાદવના વકીલે કોર્ટને જણાવ્યું હતું કે ૧૫ લાખ રૂપિયાની રોકડ રકમનું પેકેટ ભૂલથી સેક્ટર ૧૧ સ્થિત નિર્મલ યાદવના નિવાસસ્થાને પહોંચાડવામાં આવ્યું હતું, જેઓ તે સમયે હાઇકોર્ટમાં જજ પણ હતા. તેમણે આ મામલે પોલીસમાં FIR પણ નોંધાવી હતી.
જોકે, આરોપ એ હતો કે આ રોકડ રકમ જસ્ટિસ નિર્મલ યાદવ માટે હતી. આ રકમ 2007 માં પંચકુલામાં એક મિલકત વિવાદમાં હરિયાણાના તત્કાલીન એડવોકેટ જનરલ સંજીવ બંસલ દ્વારા પ્રોપર્ટી ડીલર રાજીવ ગુપ્તા અને દિલ્હીના હોટેલિયર રવિન્દર સિંહ ભસીનની તરફેણમાં આપેલા ચુકાદાના બદલામાં આપવામાં આવી હતી, જેઓ આ કેસમાં અન્ય આરોપી હતા.
