માનવશરીરના સામાન્ય તાપમાનમાં મોટો ફેરફાર ૧૫૦ વર્ષમાં ઘટ્યું માનવશરીરનું સરેરાશ તાપમાન, વૈજ્ઞાનિકો પણ ચોંક્યા વૈજ્ઞાનિકોના સર્વેમાં થયેલા ખુલાસા મુજબ, માનવ શરીરનું સરેરાશ તાપમાન ધીમે ધીમે ઘટી રહ્યું છે. લગભગ ૧૫૦ વર્ષ પહેલાં માનવ શરીરનું સરેરાશ તાપમાન આજની સરખામણીએ વધારે હતું. તે સમયે ૩૭ ડિગ્રી સેલ્સિયસને શરીરના સામાન્ય તાપમાનનો માપદંડ માનવામાં આવતો હતો. જાેકે, તાજેતરના અનેક સંશોધનોમાં તંદુરસ્ત વ્યક્તિના શરીરનું સરેરાશ તાપમાન ઘટીને આશરે ૩૬.૪ ડિગ્રી સેલ્સિયસ થયું હોવાનું સામે આવ્યું છે.અહેવાલો અનુસાર, વૈજ્ઞાનિકો આ ફેરફાર પાછળનાં કારણો સમજવાનો પ્રયાસ કરી રહ્યા છે. શું અગાઉ તાપમાન માપવામાં કોઈ ભૂલ થતી હતી કે પછી બહેતર આરોગ્ય અને બદલાતી જીવનશૈલીને કારણે શરીરનું તાપમાન ઘટ્યું છે? સંશોધન અનુસાર, હાલમાં અમેરિકાના પુખ્ત વયના લોકોના શરીરનું સરેરાશ તાપમાન આશરે ૩૬.૩૯ ડિગ્રી સેલ્સિયસ છે. ૧૯મી સદીની શરૂઆતની સરખામણીએ અમેરિકન પુરુષોના શરીરનું તાપમાન આશરે ૦.૫૯ ડિગ્રી સેલ્સિયસ ઘટ્યું છે. આ ફેરફાર માત્ર વિકસિત દેશો પૂરતો મર્યાદિત નથી.એમેઝોનનાં જંગલોમાં રહેતા ત્સિમાને સમુદાયના લોકોના શરીરનું સરેરાશ તાપમાન ૨૦૦૦ના દાયકાની શરૂઆતમાં ૩૭ ડિગ્રી સેલ્સિયસ હતું, જે ૨૦૧૮ સુધીમાં ઘટીને ૩૬.૫ ડિગ્રી સેલ્સિયસ થઈ ગયું હતું. આ સમયગાળા દરમિયાન તેમના રહેઠાણ અને જીવનશૈલીમાં પણ ફેરફાર થયો હતો. અગાઉના સમયમાં ક્ષયરોગ (ટીબી), મરડો તથા દાંત અને હાડકાંના ગંભીર ચેપ જેવી બીમારીઓ સામાન્ય હતી. આવી બીમારીઓ સામે લડવા માટે શરીરની રોગપ્રતિકારક શક્તિ વધુ સક્રિય રહેતી હતી. આ પ્રક્રિયામાં શરીર વધુ ઊર્જા ખર્ચતું હતું, જેના પરિણામે શરીરમાં ગરમી પણ ઉત્પન્ન થતી હતી.૧૮૬૦ના દાયકામાં જર્મનીના ડૉક્ટર કાર્લ વન્ડરલિચે તાવ અને શરીરના તાપમાન અંગે અભ્યાસ કર્યાે હતો. તેમણે લગભગ ૧૫ વર્ષ સુધી ૨૫ હજાર દર્દીઓના શરીરનું તાપમાન માપ્યું હતું. આ દરમિયાન તેમણે ૧૦ લાખથી વધુ તાપમાન રીડિંગ એકત્રિત કરી હતી. આ આંકડાઓના આધારે તેમણે તંદુરસ્ત પુખ્ત વયના લોકોના શરીરનું સરેરાશ તાપમાન ૩૭ ડિગ્રી સેલ્સિયસ એટલે કે ૯૮.૬ ડિગ્રી ફેરનહાઇટ નક્કી કર્યું હતું. જ્યારે ૩૮ ડિગ્રી સેલ્સિયસથી વધુ તાપમાનને તાવનું સૂચક માનવામાં આવ્યું હતું. તેમની પાસે દર્દીઓના વિશાળ પ્રમાણમાં આંકડા ઉપલબ્ધ હોવાથી ૩૭ ડિગ્રી સેલ્સિયસનો આંકડો શરીરના સામાન્ય તાપમાનનો માનક બની ગયો હતો. સ્ટેનફોર્ડ યુનિવર્સિટીના ચેપી રોગોના નિષ્ણાત જ્યુલી પાર્સાેનેટની ટીમે અમેરિકાના આશરે ૧.૯૦ લાખ લોકોના શરીરના તાપમાન સંબંધિત આંકડાઓનો અભ્યાસ કર્યાે હતો. આ આંકડા ૧૮૬૨થી ૨૦૧૭ દરમિયાન એકત્રિત કરવામાં આવ્યા હતા.
