LS Polls: કર્ણાટકમાં બેંગ્લોર પોલીસે ભાજપ અધ્યક્ષ જેપી નડ્ડા અને પાર્ટીના આઈટી સેલના વડા અમિત માલવિયાને સમન્સ મોકલ્યા છે. SC, ST સમુદાયના સભ્યોને કોઈ ચોક્કસ ઉમેદવારને મત ન આપવા માટે કથિત રીતે ધમકી આપતી સોશિયલ મીડિયા પોસ્ટના સંબંધમાં આ કાર્યવાહી કરવામાં આવી છે. અધિકારીઓએ બુધવારે જણાવ્યું કે નડ્ડા અને માલવિયાને સમન્સ મળ્યાના સાત દિવસની અંદર સવારે 11 વાગ્યે હાઈ ગ્રાઉન્ડ પોલીસ સ્ટેશનમાં તપાસ અધિકારી સમક્ષ હાજર થવા માટે કહેવામાં આવ્યું છે.
કર્ણાટક પ્રદેશ કોંગ્રેસ સમિતિ (KPCC) દ્વારા નડ્ડા, માલવિયા અને BJP કર્ણાટક એકમના પ્રમુખ BY વિજયેન્દ્ર વિરુદ્ધ ચૂંટણી પંચ અને પોલીસમાં આદર્શ આચાર સંહિતાનું ઉલ્લંઘન કરવાનો આરોપ લગાવ્યા બાદ આ પગલું લેવામાં આવ્યું છે. વરિષ્ઠ પોલીસ અધિકારીએ કહ્યું કે ભાજપના નેતાઓ વિરુદ્ધ લોક પ્રતિનિધિત્વ અધિનિયમની કલમો હેઠળ કેસ નોંધવામાં આવ્યો છે.
ફરિયાદમાં કોંગ્રેસે કર્ણાટક પ્રદેશ બીજેપીના સત્તાવાર એકાઉન્ટમાંથી પોસ્ટ કરાયેલા એક વીડિયોને ટાંક્યો છે. તેમણે આરોપ લગાવ્યો છે કે આ એકાઉન્ટ ભાજપના રાષ્ટ્રીય અધ્યક્ષ જેપી નડ્ડા અને પ્રદેશ અધ્યક્ષ બીવાય વિજયેન્દ્રના નિર્દેશ પર પાર્ટીના આઈટી સેલના વડા અમિત માલવિયા ચલાવે છે. કોંગ્રેસે આરોપ લગાવ્યો છે કે વીડિયોમાં રાહુલ ગાંધી અને મુખ્યમંત્રી સિદ્ધારમૈયાના એનિમેટેડ પાત્રો બતાવવામાં આવ્યા છે. વીડિયો ક્લિપમાં SC, ST અને OBC (અન્ય પછાત વર્ગ) સમુદાયોને માળામાં મૂકેલા ‘ઇંડા’ તરીકે દર્શાવવામાં આવ્યા છે અને રાહુલ ગાંધી મુસ્લિમ સમુદાયના નામે મોટું ઇંડા મૂકતા પણ દર્શાવે છે. એવું ચિત્રિત કરવામાં આવ્યું છે કે મુસ્લિમ સમુદાયનું પ્રતિનિધિત્વ કરતા બચ્ચાઓને પૈસા આપવામાં આવે છે, જેઓ પછી એસસી, એસટી અને ઓબીસી સમુદાયોને બહાર ફેંકી દે છે.
