Bengal: પશ્ચિમ બંગાળ પોલીસે મંગળવારે NIA ટીમ પર હુમલાના સંબંધમાં બે NIA અધિકારીઓને સમન્સ જારી કર્યા છે. આ સમન્સમાં બંગાળ પોલીસે હુમલાની ફરિયાદ કરનારા બંને અધિકારીઓ અને હુમલામાં ઘાયલ થયેલા એક અધિકારીને પણ સમન્સ પાઠવ્યા છે. હુમલામાં ઘાયલ થયેલા અધિકારીને સાક્ષી તરીકે બોલાવવામાં આવ્યા છે. ઘાયલ અધિકારીને તેમના મેડિકલ ડોક્યુમેન્ટ લાવવા માટે પણ કહેવામાં આવ્યું છે. પોલીસે NIA અધિકારીઓને હુમલામાં ક્ષતિગ્રસ્ત કાર લાવવા માટે પણ કહ્યું છે. પોલીસ કારની ફોરેન્સિક તપાસ કરશે. સાથે જ NIAએ બંગાળ પોલીસની FIR વિરુદ્ધ હાઈકોર્ટમાં અરજી કરી છે.
બંગાળ પોલીસે ગ્રામજનોને સમન્સ પણ મોકલ્યા હતા
ભૂપતિનગર પોલીસ સ્ટેશનના તપાસ અધિકારીઓએ NIA ટીમ પર હુમલાના કેસમાં ત્રણ ગ્રામજનોને પૂછપરછ માટે બોલાવ્યા છે. ગ્રામજનોને આગામી બે-ત્રણ દિવસમાં પોલીસ સમક્ષ હાજર થવા જણાવાયું છે. NIA અધિકારીઓને 11 એપ્રિલે પોલીસ સમક્ષ હાજર થવા માટે કહેવામાં આવ્યું છે. વર્ષ 2022માં પૂર્વ મિદનાપુર જિલ્લાના ભૂપતિનગરમાં થયેલા બોમ્બ વિસ્ફોટના કેસની તપાસ કરવા NIAની ટીમ ગયા શનિવારે પહોંચી હતી. આ વિસ્ફોટમાં ત્રણ લોકોના મોત થયા હતા. જ્યારે તપાસ એજન્સી બંને આરોપીઓને કોલકાતા લઈ જઈ રહી હતી ત્યારે સ્થાનિક ગ્રામજનોએ NIA ટીમ પર હુમલો કર્યો હતો. પથ્થરમારાને કારણે NIAના ઘણા વાહનોને નુકસાન થયું હતું. NIAના કેટલાક અધિકારીઓ પણ ઘાયલ થયા છે. NIAએ આ મામલામાં FIR નોંધી હતી.
બંગાળ પોલીસે આ મામલે NIA વિરુદ્ધ કેસ પણ નોંધ્યો હતો. આ FIRના આધારે પોલીસે NIA અધિકારીઓને પૂછપરછ માટે બોલાવ્યા છે. આ મુદ્દે ભારે રાજકારણ પણ થઈ રહ્યું છે. જ્યારે ભાજપ NIA ટીમ પરના હુમલાને રાજ્યમાં કાયદો અને વ્યવસ્થાની નિષ્ફળતા ગણાવી રહી છે. જ્યારે મમતા બેનર્જીએ NIAના દરોડા પર સવાલો ઉઠાવ્યા હતા. તેમણે આરોપ લગાવ્યો કે કેન્દ્રીય તપાસ એજન્સીઓ સામાન્ય ચૂંટણી સમયે ભાજપ સાથે મળીને ટીએમસી કાર્યકર્તાઓને નિશાન બનાવી રહી છે.
NIA હાઈકોર્ટ પહોંચી
NIAએ બંગાળ પોલીસ દ્વારા દાખલ કરવામાં આવેલી FIR રદ કરાવવા માટે કલકત્તા હાઈકોર્ટમાં અરજી કરી છે. NIAએ મંગળવારે હાઈકોર્ટમાં અરજી દાખલ કરીને તેની સામે નોંધાયેલી FIR રદ કરવાની માંગ કરી છે. NIAએ બંગાળ પોલીસની કોઈપણ કાર્યવાહીથી રક્ષણ મેળવવા માટે પણ અપીલ કરી છે.
