વૈશ્વિક બજારમાં ધાતુઓની કિંમતોમાં ઐતિહાસિક તેજી.એસી, કિચન અને બાથ ફિટિંગ સામાન થશે મોંઘા!.આંતરરાષ્ટ્રીય સ્તરે એલ્યુમિનિયમ, કોપર અને નિકલ જેવી જીવનજરૂરી ધાતુઓના ભાવમાં ઐતિહાસિક ઉછાળો.વૈશ્વિક બજારમાં કાચા માલના વધતા ભાવ હવે સામાન્ય ગ્રાહકોના ઘર સુધી પહોંચી રહ્યા છે. આંતરરાષ્ટ્રીય સ્તરે એલ્યુમિનિયમ, કોપર અને નિકલ જેવી જીવનજરૂરી ધાતુઓના ભાવમાં ઐતિહાસિક ઉછાળો આવતા મેન્યુફેક્ચરિંગ સેક્ટરમાં ખળભળાટ છે. ઉત્પાદન ખર્ચમાં થયેલો આ અસહ્ય વધારો હવે એસી, કિચન અપ્લાયન્સિસ અને બાથ ફિટિંગ્સ જેવી ચીજવસ્તુઓના ભાવમાં તોતિંગ વધારા તરીકે ગ્રાહકો સામે આવે તેવી પૂરેપૂરી શક્યતા છે.
વૈશ્વિક બજારમાં ધાતુઓની કિંમતોમાં ઐતિહાસિક તેજી જાેવા મળી રહી છે, જેમાં ખાસ કરીને કોપર અને એલ્યુમિનિયમ જેવી બેઝ મેટલ્સ નવા રેકોર્ડ સર્જી રહી છે. આંતરરાષ્ટ્રીય સ્તરે કોપર ૧૨,૦૦૦ ડોલર પ્રતિ ટનની ઓલ-ટાઇમ હાઈ સપાટી વટાવી ચૂક્યું છે, જેની અસર MCX પર પણ દેખાઈ રહી છે અને ત્યાં ભાવ કિલો દીઠ રૂ.૧૩૦૦ સુધી પહોંચી ગયા છે. તેવી જ રીતે, એલ્યુમિનિયમ પણ ૩,૦૦૦ ડોલર પ્રતિ ટનથી વધુ કિંમતે વેચાઈને છેલ્લા ત્રણ વર્ષની સર્વોચ્ચ સપાટી પર છે. માત્ર ઔદ્યોગિક ધાતુઓ જ નહીં, પરંતુ કિંમતી ધાતુઓમાં પણ વર્ષ ૨૦૨૫માં અભૂતપૂર્વ ઉછાળો આવ્યો છે, જેમાં સોનાએ અંદાજે ૬૫% અને ચાંદીએ આશ્ચર્યજનક ૧૪૫% જેટલું મજબૂત રિટર્ન આપીને રોકાણકારોને માલામાલ કર્યા છે. કાચા માલના ભાવમાં થયેલા અસહ્ય વધારાને કારણે ઉત્પાદક કંપનીઓ હવે વધારાનો આર્થિક બોજ સહન કરવાની સ્થિતિમાં રહી નથી, જેની સીધી અસર હવે ઘરગથ્થુ વપરાશની ચીજાે પર જાેવા મળશે. વિવિધ રિપોર્ટ્સ અનુસાર, એસી, ફ્રિજ અને કિચન અપ્લાયન્સિસના ભાવમાં ૫ થી ૮ ટકાનો તોતિંગ વધારો થવાની સંભાવના છે.
આ ઉપરાંત, બાથવેર ક્ષેત્રે પણ મોટી અસર પડી રહી છે; ખાસ કરીને નળ અને અન્ય ફિટિંગ્સમાં વપરાતા પિત્તળના ભાવ તાંબાની તેજીને કારણે વધતા કંપનીઓ હવે ભાવ વધારાની તૈયારીમાં છે. માત્ર મોટા ઉપકરણો જ નહીં, પરંતુ રસોડામાં વપરાતા કુકવેર અને અન્ય નાના સાધનો પણ મોંઘા થવા જઈ રહ્યા છે, જે સામાન્ય ગ્રાહકોના ઘરના બજેટને ખોરવી નાખશે.
વૈશ્વિક બજારમાં ધાતુઓની કિંમતો વધવા પાછળ મુખ્યત્વે સપ્લાય અને પ્રોડક્શનની સમસ્યાઓ જવાબદાર છે. એલ્યુમિનિયમની વાત કરીએ તો, ચીનમાં ઉત્પાદન ક્ષમતા પર મુકાયેલા પ્રતિબંધો અને યુરોપમાં મોંઘી વીજળીને કારણે તેનું ઉત્પાદન ઘટ્યું છે, જ્યારે બીજી તરફ ઇન્ફ્રાસ્ટ્રક્ચર ક્ષેત્રે તેની માંગ વધી રહી છે.
કોપરમાં ઇન્ડોનેશિયા અને ચિલી જેવા દેશોમાં માઇનિંગ અકસ્માતો અને હડતાલને કારણે સપ્લાયમાં મોટો ઘટાડો થયો છે, જેને લીધે વર્ષ ૨૦૦૯ પછીનો સૌથી મોટો ભાવવધારો જાેવા મળ્યો છે. તેવી જ રીતે, નિકલના ભાવમાં ઉછાળો આવવાનું મુખ્ય કારણ વિશ્વના સૌથી મોટા ઉત્પાદક દેશ ઇન્ડોનેશિયા દ્વારા કરવામાં આવેલો ઉત્પાદન કાપ છે. આમ, વૈશ્વિક સ્તરે ઉત્પાદન ઓછું અને માંગ વધુ હોવાથી કિંમતો સતત વધી રહી છે.
