ક્રિસ વોક્સે આંતરરાષ્ટ્રીય ક્રિકેટમાંથી નિવૃત્તિ લીધી, ૧૫ વર્ષની સફરનો છે શાનદાર અંત

વોક્સે પોતાની નિવૃત્તિ પર એક લાંબી સોશિયલ મીડિયા પોસ્ટ શેર કરી હતી અને કહ્યું કે આ ક્ષણ આવી ગઈ છે. મેં નક્કી કર્યું છે કે આંતરરાષ્ટ્રીય ક્રિકેટમાંથી નિવૃત્તિ લેવાનો આ યોગ્ય સમય છે, ઇંગ્લેન્ડ માટે રમવું એ એવી વસ્તુ હતી જેનું મેં બાળપણથી સ્વપ્ન જાેયું હતું. હું મારી જાતને ખૂબ જ ભાગ્યશાળી માનું છું કે મને તે સપનાઓ સાકાર થયા. છેલ્લા ૧૫ વર્ષથી ઇંગ્લેન્ડનું પ્રતિનિધિત્વ કરવું, થ્રી લાયન્સ જર્સી પહેરવી અને મારા સાથી ખેલાડીઓ સાથે મેદાન શેર કરવું, જેમાંથી ઘણા મારા જીવનભરના મિત્રો છે, તે એવી બાબતો છે જેના પર મને ખૂબ ગર્વ છે.

તેમણે ઉમેર્યું કે ૨૦૧૧માં ઓસ્ટ્રેલિયામાં મારું ડેબ્યૂ ગઈકાલ જેવું લાગે છે. જાેકે, જ્યારે તમે તમારી જાતને માણી રહ્યા હોવ ત્યારે સમય ઉડી જાય છે. બે વર્લ્ડ કપ જીતવા અને કેટલીક અદ્ભુત એશિઝ શ્રેણીનો ભાગ બનવાની મેં ક્યારેય કલ્પના પણ નહોતી કરી. મારા સાથી ખેલાડીઓ સાથેની તે યાદો અને ઉજવણીઓ હંમેશા મારી સાથે રહેશે.

ઓલરાઉન્ડરે તેમના પરિવારનો તેમના અવિરત સમર્થન માટે આભાર માન્યો. તે કાઉન્ટી ક્રિકેટ રમવાનું ચાલુ રાખશે અને ફ્રેન્ચાઇઝી લીગમાં પણ તકો શોધશે. મારા માતા-પિતા, મારી પત્ની એમી અને અમારી પુત્રીઓ લૈલા અને એવીનો વર્ષોથી તેમના અતૂટ પ્રેમ, સમર્થન અને બલિદાન બદલ આભાર. તમારા વિના, આ કંઈ શક્ય ન બન્યું હોત.

વોક્સે કહ્યું કે, ચાહકો, ખાસ કરીને બાર્મી આર્મીનો, તેમના જુસ્સા, ઉત્સાહ અને વિશ્વાસ માટે આભાર. મારા કોચ, સાથી ખેલાડીઓ અને પડદા પાછળ (ઇંગ્લેન્ડ અને વોરવિકશાયર ખાતે) દરેકનું માર્ગદર્શન અને મિત્રતા મારા માટે ખૂબ જ મહત્વપૂર્ણ છે. હું નજીકના ભવિષ્યમાં કાઉન્ટી ક્રિકેટ રમવાનું ચાલુ રાખવા અને વધુ ફ્રેન્ચાઇઝી તકો શોધવા માટે આતુર છું.