યુરિયા બેગમાં છુપાવેલું હતું, બેની ધરપકડ.રાજસ્થાનમાં ૧૫૦ કિલોગ્રામ વિસ્ફોટક લઈ જતી કાર પકડાઈ.એમોનિયમ નાઈટ્રેટ ઉપરાંત પોલીસે ૨૦૦ વિસ્ફોટક બેટરી અને ૧૧૦૦ મીટર જેટલું વાયર પણ કબજે લીધું.રાજસ્થાનના ટોંક જિલ્લામાં ભારે માત્રામાં વિસ્ફોટક મળી આવ્યું હતું. માહિતી અનુસાર પોલીસે એક કારમાંથી આશરે ૧૫૦ કિલો જેટલું એમોનિયમ નાઈટ્રેટ જપ્ત કર્યું છે. આ ઉપરાંત પોલીસે ૨૦૦ વિસ્ફોટક બેટરી અને ૧૧૦૦ મીટર જેટલું વાયર પણ કબજે લીધું છે. આ મામલે બે આરોપીઓની ધરપકડ કરવામાં આવી છે.
ટોંકના ડીએસપી મૃત્યુંજય મિશ્રાએ કહ્યું કે એક મારુતિ સિયાઝ કારમાંથી આ વિસ્ફોટકનો જથ્થો મળી આવ્યો હતો. આ મામલે બે આરોપીઓને પકડીને પૂછપરછ શરૂ કરી દેવામાં આવી છે. ઉલ્લેખનીય છે કે હાલમાં સમગ્ર દેશમાં ૨૦૨૫ની વિદાય અને નવા વર્ષ ૨૦૨૬ના આગમનને લઈને અનેક કાર્યક્રમ-પાર્ટી યોજાવાના છે જેના પગલે કોઈ અણગમતી ઘટના ન બને તેવા ઉદ્દેશ્યથી પોલીસે કડક હાથે પેટ્રોલિંગ-તપાસ શરૂ કરી દીધી છે.
આરોપીઓની ઓળખ સુરેન્દ્ર ભંવરલાલ (૪૮) અને સુરેન્દ્ર દુલીલાલ મોચી (૩૩) તરીકે થઇ હતી. બંને કરવર બુંદીના રહેવાશી હતા. પોલીસે બંનેને પકડી પાડીને વિસ્ફોટક લાવ્યા ક્યાંથી અને ક્યાં લઇને જઇ રહ્યા હતા તે દિશામાં તપાસ શરૂ કરી હતી.
