ભારતનું પ્રથમ પ્રાઇવેટ ઓર્બિટલ રોકેટ.સ્કાયરૂટના વિક્રમ-૧ને તેલંગાણાના મુખ્યપ્રધાને શ્રીહરિકોટા માટે રવાના કર્યું.આ રોકેટ હવે શ્રીહરિકોટાના સતીશ ધવન સ્પેસ સેન્ટર ખાતેના લોન્ચ સાઇટ માટે સત્તાવાર રીતે પ્રસ્થાન કરી ચૂક્યું છે.ભારતના પ્રથમ ખાનગી ઓર્બિટલ રોકેટ ‘વિક્રમ-૧’ને આજે તેલંગાણાના મુખ્યમંત્રી રેવંત રેડ્ડી દ્વારા હૈદરાબાદ સ્થિત કંપનીના મેક્સ-ક્યૂ કેમ્પસમાંથી વિધિવત રીતે રવાના કરવામાં આવ્યું હતું. આ રોકેટ હવે શ્રીહરિકોટાના સતીશ ધવન સ્પેસ સેન્ટર ખાતેના લોન્ચ સાઇટ માટે સત્તાવાર રીતે પ્રસ્થાન કરી ચૂક્યું છે.
કાર્યક્રમ દરમિયાન મુખ્યમંત્રીએ રોકેટના સ્પેસ-રેડી ‘પેલોડ ફેરિંગ‘ને લીલી ઝંડી બતાવી હતી. પેલોડ ફેરિંગ એવું માળખું છે જે ઉડાન દરમિયાન રોકેટની અંદર રહેલા ઉપગ્રહોને સુરક્ષિત રાખે છે.
સ્કાયરૂટના કર્મચારીઓને સંબોધતા તેલંગાણાના મુખ્યમંત્રીએ જણાવ્યું કે, આ પ્રસંગ તેલંગાણાને એરોસ્પેસ ક્ષેત્રમાં વૈશ્વિક નેતૃત્વ તરફ આગળ વધારવા માટેનું એક મહત્વપૂર્ણ સીમાચિહ્ન છે. તેમણે વધુમાં ઉમેર્યું કે, રાજ્ય સરકાર વૈશ્વિક યુનિવર્સિટીઓ અને ઉદ્યોગના અગ્રણી ભાગીદારો સાથે સહયોગ કરી યુવાનોને એરોસ્પેસ ક્ષેત્રમાં કૌશલ્યબદ્ધ બનાવવા પર ધ્યાન કેન્દ્રિત કરી રહી છે. મજબૂત નીતિઓ અને આધુનિક ઈન્ફ્રાસ્ટ્રક્ચર સાથે સરકાર સ્કાયરૂટ જેવી કંપનીઓને સમર્થન આપવા પ્રતિબદ્ધ છે.
ફ્લાઇટ હાર્ડવેરના ફ્લેગ-ઓફ સાથે સ્કાયરૂટની સુવિધાઓ ખાતે પ્રી-ફ્લાઇટ ટેસ્ટિંગ પ્રક્રિયા પૂર્ણ થઈ છે. રોકેટના પ્રપલ્શન સ્ટેજિસ પહેલેથી જ શ્રીહરિકોટા સ્થિત સ્પેસપોર્ટ પર સુરક્ષિત રીતે પહોંચાડી દેવામાં આવ્યા છે. સ્કાયરૂટ એરોસ્પેસના સહ-સ્થાપક અને સીઈઓ પવન કુમાર ચંદનાએ જણાવ્યું કે, મુખ્યમંત્રી દ્વારા વિક્રમ-૧ રોકેટને રવાના કરવામાં આવ્યું તે ગૌરવની બાબત છે. આ લોન્ચ ભારતના ઉભરતા ખાનગી સ્પેસ-ટેક ઉદ્યોગ માટે સીમાચિહ્ન સાબિત થશે. વિક્રમ-૧ દ્વારા અમે ઓન-ડિમાન્ડ સેટેલાઇટ લોન્ચિંગ સુવિધા ઉપલબ્ધ કરાવી અવકાશને વધુ સુલભ બનાવવાનો પ્રયાસ કરી રહ્યા છીએ.
વિક્રમ-૧ ની મુખ્ય વિશેષતાઓ:
ક્ષમતા: લો અર્થ ઓર્બિટમાં ૩૫૦ કિલોગ્રામ સુધીના નાના ઉપગ્રહો સ્થાપિત કરવા માટેની ડિઝાઇન.
નિર્માણ: સાત માળ જેટલી ઊંચાઈ ધરાવતા આ રોકેટનું નિર્માણ સંપૂર્ણ કાર્બન કોમ્પોઝિટ સ્ટ્રક્ચરથી કરવામાં આવ્યું છે.
ટેકનોલોજી: તેમાં 3D-પ્રિન્ટેડ એન્જિન અને ઉચ્ચ થ્રસ્ટ ધરાવતા સોલિડ ફ્યુઅલ રોકેટ બૂસ્ટર્સનો ઉપયોગ થયો છે.
આગામી ઉડાન વિક્રમ-૧ મિશનોની શ્રેણીમાં પ્રથમ છે, જે સ્કાયરૂટને વૈશ્વિક સેટેલાઇટ ઓપરેટર્સ માટે નિયમિત કોમર્શિયલ લોન્ચ સેવાઓ પૂરી પાડવામાં મદદરૂપ થશે. આ લોન્ચ ઇન-સ્પેસ (IN-SPACe) ની મંજૂરી હેઠળ અને ઇસરો (ISRO) ની ટેકનિકલ દેખરેખ હેઠળ યોજાશે.
