નાર્કોટિક્સ કંટ્રોલ બ્યુરો (NCB), ભારતીય નૌકાદળ અને ગુજરાત પોલીસની એન્ટી-ટેરરિસ્ટ સ્ક્વોડ (ATS) એ ગુજરાતના પોરબંદર દરિયાકાંઠે ભારતીય જળસીમામાં સંયુક્ત ઓપરેશનમાં ડ્રગ્સનું વિશાળ કન્સાઈનમેન્ટ જપ્ત કર્યું છે. 700 કિલો મેથામ્ફેટામાઈનનો જથ્થો ઝડપાયો છે. આંતરરાષ્ટ્રીય બજારમાં આ દવાની કિંમત 2500 થી 3500 કરોડ રૂપિયા આંકવામાં આવી છે.
આ ઓપરેશન ‘સાગર મંથન-4’ હેઠળ હાથ ધરવામાં આવ્યું હતું. NCB અનુસાર, ગુપ્ત માહિતીના આધારે, એક બિન-રજિસ્ટર્ડ બોટની ઓળખ કરવામાં આવી હતી, જેમાં ઓટોમેટિક આઇડેન્ટિફિકેશન સિસ્ટમ (AIS) ન હતી.
700 કિલો ડ્રગ્સ સાથે આઠ ઈરાની નાગરિકોની ધરપકડ
અધિકારીએ જણાવ્યું હતું કે દરિયાઈ પેટ્રોલિંગ જહાજોની મદદથી બોટને રોકવામાં આવી હતી. સર્ચ દરમિયાન, 700 કિલો ડ્રગ્સ મળી આવ્યું હતું અને આઠ ઈરાની નાગરિકોની ધરપકડ કરવામાં આવી હતી, જેમની પાસે કોઈ ઓળખ કાર્ડ નહોતું.
અધિકારીઓએ જણાવ્યું હતું કે ડ્રગ્સના આ કન્સાઇનમેન્ટને રોકવામાં NCB, ભારતીય નેવી અને ગુજરાત પોલીસ ATSએ મહત્વની ભૂમિકા ભજવી હતી. નૌકાદળના પ્રવક્તાએ કહ્યું કે આ વર્ષે દરિયાઈ માર્ગ પર આ બીજું મોટું એન્ટી-નાર્કોટિક્સ ઓપરેશન છે.
અમિત શાહે આ કાર્યવાહીની પ્રશંસા કરી હતી
કેન્દ્રીય ગૃહ પ્રધાન અમિત શાહે તેને ‘ડ્રગ-ફ્રી ઈન્ડિયા’ના સરકારના ધ્યેય તરફ એક મોટું પગલું ગણાવ્યું હતું, ‘આજે વડા પ્રધાન નરેન્દ્ર મોદીના ‘ડ્રગ-ફ્રી ઈન્ડિયા’ના વિઝનને સાકાર કરવા તરફ અમારી એજન્સીઓએ આંતરરાષ્ટ્રીય ડ્રગ સ્મગલિંગ રેકેટનો પર્દાફાશ કર્યો છે. અને 700 કિલો ડ્રગ્સ જપ્ત કર્યું હતું.
આ વર્ષે દરિયાઈ માર્ગેથી 3,500 કિલોથી વધુ ડ્રગ્સ ઝડપાયું છે. આ ઓપરેશનમાં 11 ઈરાની અને 14 પાકિસ્તાની નાગરિકોની ધરપકડ કરવામાં આવી છે. આ તમામ હાલ જેલમાં છે અને કેસ કોર્ટમાં છે.
