ગુજરાતના ભરૂચ જિલ્લામાં ધાર્મિક ધ્વજ લગાવવાને લઈને બે સમુદાયો વચ્ચે અથડામણ થઈ હતી, જેમાં બે લોકો ઘાયલ થયા હતા. પોલીસે જણાવ્યું કે ગોકુલ નગર વિસ્તારમાં મંગળવારે રાત્રે બનેલી ઘટનાના સંબંધમાં 17 લોકોની અટકાયત કરવામાં આવી છે.
એક અધિકારીએ જણાવ્યું કે માહિતી મળતાની સાથે જ પોલીસ ઘટનાસ્થળે પહોંચી અને તોફાનીઓને વિખેરી નાખ્યા. તેમણે કહ્યું કે હાલ સ્થિતિ નિયંત્રણમાં છે. ભરૂચના પોલીસ અધિક્ષક મયુર ચાવડાએ જણાવ્યું હતું કે બંને પક્ષના લોકો મોટી સંખ્યામાં એકઠા થયા હતા અને એકબીજા પર પથ્થરમારો શરૂ કર્યો હતો.
સૂત્રોના જણાવ્યા અનુસાર, ગોકુલ નગરમાં બંને સમુદાયના લોકોની મિશ્ર વસ્તી છે અને અહીં પરિસ્થિતિ ત્યારે તંગ બની હતી જ્યારે એક સમુદાયના કેટલાક લોકોએ ઈદ-એ-મિલાદના તહેવારને ધ્યાનમાં રાખીને રાત્રે આ વિસ્તારમાં ધાર્મિક ઝંડા અને બેનરો લગાવવાનું શરૂ કર્યું હતું. . (bharuch dhvaj vivad)
હિંસામાં સામેલ થવા બદલ 20 લોકો સામે એફઆઈઆર નોંધી છે. તેમાંથી 17ની પૂછપરછ માટે અટકાયત કરવામાં આવી છે. હાલ સ્થિતિ નિયંત્રણમાં છે. આવી જ એક ઘટના રવિવારે ગુજરાતના સુરતમાં બની હતી, જ્યાં કેટલાક લોકોએ ભગવાન ગણેશના પંડાલ પર પથ્થરમારો કર્યો હતો. આ પછી હિંસક અથડામણ થઈ હતી. પોલીસે આ કેસમાં 27 લોકોની ધરપકડ કરી હતી.
