વિદ્યાર્થીઓ માટે ખુશખબર.શાળાના વિદ્યાર્થીઓ માટે દિવાળી વેકેશન ૨૦૨૫ની તારીખોની જાહેરાત થઈ.રાજ્યની તમામ માન્ય માધ્યમિક શાળાઓમાં ૧૬ ઓક્ટોબરથી ૫ નવેમ્બર સુધી ૨૧ દિવસનું દિવાળી વેકેશન જાહેર કરાયુ.ગુજરાત રાજ્યની શાળાઓમાં આ વર્ષે દિવાળી વેકેશન ૨૧ દિવસનું નક્કી કરાયું છે. જાેકે, આ વખતનું વેકેશન માધ્યમિક અને પ્રાથમિક શાળાઓમાં એક દિવસના તફાવત સાથે શરૂ અને પૂરું થશે. માધ્યમિક શાળાઓમાં વેકેશન ૧૬મી ઓક્ટોબરથી શરૂ થઈ ૫મી નવેમ્બર સુધી રહેશે, જ્યારે પ્રાથમિક શાળાઓમાં ૧૭મી ઓક્ટોબરથી શરૂ થઈ ૬ઠ્ઠી નવેમ્બર સુધી ચાલશે.
ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા જાહેર કરાયેલા આદેશ મુજબ, રાજ્યની તમામ માન્ય માધ્યમિક શાળાઓમાં ૧૬ ઓક્ટોબરથી ૫ નવેમ્બર સુધી ૨૧ દિવસનું દિવાળી વેકેશન જાહેર કરાયું છે. તે જ સમયે, રાજ્યના પ્રાથમિક શિક્ષણ નિયામક દ્વારા અલગથી જાહેર કરાયેલા પરિપત્ર મુજબ, પ્રાથમિક શાળાઓમાં ૧૭ ઓક્ટોબરથી ૬ નવેમ્બર સુધી વેકેશન રહેશે.
છેલ્લા ઘણાં વર્ષોથી રાજ્યની તમામ શાળાઓમાં દિવાળી અને ઉનાળું વેકેશન એકસાથે શરૂ થતું અને એકસાથે પૂરું થતું હતું. પરંતુ આ શૈક્ષણિક વર્ષથી આ પરંપરા તૂટશે. માધ્યમિક શાળાઓમાં વેકેશન એક દિવસ વહેલું શરૂ થવાથી વિદ્યાર્થીઓ અને શિક્ષકો માટે થોડો તફાવત રહેશે.
વિભાગના અધિકારીઓ મુજબ, માધ્યમિક બોર્ડના શૈક્ષણિક કેલેન્ડર મુજબ પરીક્ષા અને ટર્મનાં કાર્યક્રમને ધ્યાને રાખીને વેકેશનનો સમયગાળો નક્કી કરાયો છે. જ્યારે પ્રાથમિક શિક્ષણ વિભાગે અલગ ધોરણે પોતાના શૈક્ષણિક સમયપત્રક મુજબ તારીખો જાહેર કરી છે.
દિવાળી વેકેશન બાદ તમામ શાળાઓમાં નવેમ્બર મહિનાથી નિયમિત અભ્યાસક્રમ ફરી શરૂ થશે. શિક્ષણ વિભાગે જિલ્લા શિક્ષણાધિકારીઓને સૂચના આપી છે કે, વેકેશન પૂર્ણ થતાં જ તમામ શાળાઓમાં સમયસર હાજરી અને હાજરી રજિસ્ટરની ચકાસણી કરવાની રહેશે. સત્તાવાર રીતે સ્પષ્ટ કરાયું છે કે, વેકેશન દરમિયાન કોઈ શાળાઓ “એક્ટિવિટી ક્લાસ” અથવા અન્ય પ્રવૃત્તિઓ યોજશે તો તેની પૂર્વ મંજૂરી ફરજિયાત રહેશે.
દિવાળી વેકેશનની તારીખો (૨૦૨૫–૨૬):માધ્યમિક શાળાઓ: ૧૬ ઓક્ટોબરથી ૫ નવેમ્બર, પ્રાથમિક શાળાઓ: ૧૭ ઓક્ટોબરથી ૬ નવેમ્બર, કુલ વેકેશન સમયગાળો: ૨૧ દિવસ
