દિલ્હી વિધાનસભાના અધ્યક્ષ અને શાહદરાના ધારાસભ્ય રામ નિવાસ ગોયલે ગુરુવારે આમ આદમી પાર્ટી (AAP)ના રાષ્ટ્રીય સંયોજક અરવિંદ કેજરીવાલને લખેલા પત્રમાં ચૂંટણીના રાજકારણમાંથી નિવૃત્તિ લેવાની જાહેરાત કરી હતી. ગોયલે (76) ચૂંટણી મેદાનમાંથી ખસી જવા પાછળનું કારણ તેમની ઉંમરને ટાંક્યું હતું, જોકે, તેમણે કેજરીવાલને પક્ષની સેવા કરવાનું ચાલુ રાખવાની ખાતરી આપી હતી.
દિલ્હી વિધાનસભાની ચૂંટણી પહેલા નિવૃત્તિ
દિલ્હી વિધાનસભાની ચૂંટણી પહેલા બે વખતના ધારાસભ્યની નિવૃત્તિ AAP માટે મોટો ઝટકો છે. કેજરીવાલને લખેલા પત્રમાં ગોયલે કહ્યું, “હું તમને નમ્રતાપૂર્વક જણાવવા માંગુ છું કે છેલ્લા 10 વર્ષથી, મેં શાહદરા વિધાનસભાના ધારાસભ્ય અને અધ્યક્ષ તરીકે મારી ફરજો અસરકારક રીતે નિભાવી છે. તમે હંમેશા મને ખૂબ સન્માન આપ્યું છે, જેના માટે હું હંમેશા તમારો આભારી રહીશ. પાર્ટી અને તમામ ધારાસભ્યોએ પણ મને ઘણું સન્માન આપ્યું છે. જેના માટે હું દરેકનો આભાર વ્યક્ત કરું છું.
હું આમ આદમી પાર્ટીમાં જ રહીશ
મારી ઉંમરને કારણે હું મારી જાતને ચૂંટણીના રાજકારણથી દૂર રાખવા માંગુ છું. હું તમને ખાતરી આપું છું કે હું આમ આદમી પાર્ટીમાં જ રહીશ અને મારા તન-મનથી સેવા કરતો રહીશ. તમે મને જે પણ જવાબદારી સોંપશો, હું તેને નિભાવવાનો પ્રયત્ન કરીશ.” રામ નિવાસ ગોયલ આમ આદમી પાર્ટીના સૌથી વરિષ્ઠ નેતાઓમાંના એક છે અને હાલમાં દિલ્હી વિધાનસભાના અધ્યક્ષ તરીકે સેવા આપે છે.
અરવિંદ કેજરીવાલે જણાવ્યું હતું
AAPના રાષ્ટ્રીય સંયોજક અરવિંદ કેજરીવાલે કહ્યું કે ગોયલની રાજનીતિમાંથી નિવૃત્તિ પાર્ટી માટે ભાવનાત્મક ક્ષણ છે. તેમના માર્ગદર્શને વર્ષોથી ગૃહની અંદર અને બહાર અમને સાચી દિશા બતાવી છે. તેમની વધતી જતી ઉંમર અને તબિયતના કારણે તેમણે થોડા દિવસો પહેલા જ ચૂંટણીની રાજનીતિ છોડવાની ઈચ્છા વ્યક્ત કરી હતી. અમે તેમના નિર્ણયનું સન્માન કરીએ છીએ. ગોયલ સાહેબ અમારા પરિવારના રક્ષક હતા, છે અને રહેશે. પાર્ટીને ભવિષ્યમાં પણ તેમના અનુભવ અને સેવાઓની હંમેશા જરૂર રહેશે.
