સરકારી ભાવ માત્ર રૂ.૩૫ પ્રતિ કિલો ૧૦ જ દિવસમાં વેચાઈ ગઈ ૪,૦૦૦ ટન ડુંગળી ડુંગળીના ભાવ નિયંત્રિત કરવા મોદી સરકારે ૧૭ શહેરોમાં બફર સ્ટોકમાંથી ૪,૦૦૦ ટન ડુંગળી વેચી છે ડુંગળીના આસમાને પહોંચતા ભાવ પર અંકુશ મેળવવા માટે કેન્દ્રની મોદી સરકારે બફર સ્ટોકમાંથી રાહત દરે ડુંગળીનું વેચાણ શરૂ કર્યું છે. ગ્રાહક બાબતોના મંત્રાલયના તાજેતરના આંકડા અનુસાર, સરકારે માત્ર ૧૦ જ દિવસમાં ૧૭ વિવિધ શહેરોમાં ૪,૦૦૦ ટન બફર સ્ટોકની ડુંગળી રૂ.૩૫ પ્રતિ કિલોના સબસિડી વાળા ભાવે વેચી દીધી છે.
ગ્રાહક બાબતોના સચિવ નિધિ ખરેએ આ અંગે વિગતો આપતા જણાવ્યું હતું કે:
કુલ સ્ટોક: કેન્દ્ર સરકારે પોતાની એજન્સીઓ NCCF અને NAFED દ્વારા વર્ષ ૨૦૨૬ માટે કુલ ૧.૨૧ લાખ ટન ડુંગળીનો બફર સ્ટોક જમા રાખ્યો છે.
કાંદા એક્સપ્રેસ: ઉત્પાદક રાજ્યોમાંથી વપરાશકારો સુધી જથ્થાબંધ ડુંગળી પહોંચાડવા માટે કાંદા એક્સપ્રેસ નામની સ્પેશિયલ ટ્રેન અને ટ્રકોનો ઉપયોગ કરવામાં આવી રહ્યો છે.
દિલ્હી અને ચેન્નાઈ સુધી વિશાળ જથ્થો પહોંચાડી દેવાયો છે, જ્યારે આગામી સમયમાં ગુવાહાટી માટે ત્રીજી ખેપ રવાના થઈ રહી છે.
NCCF નું યોગદાન: NCCF ના એમડી અનીસ જાેસેફ ચંદ્રના જણાવ્યા મુજબ, તેમના ફેડરેશને મોબાઈલ વેન, પોતાના આઉટલેટ્સ અને સહકારી મંડળીઓ મારફતે અત્યાર સુધીમાં ૧,૫૦૦ ટન ડુંગળી રૂ.૩૫ ના ભાવે વેચી છે.
સરકારી આંકડા અનુસાર, બફર સ્ટોક રિલીઝ કરવાથી દેશમાં ડુંગળીના સરેરાશ રિટેલ ભાવ રૂ.૫૦.૭૯ થી ઘટીને રૂ.૪૮.૫ પ્રતિ કિલો પર આવ્યા છે. આમ છતાં, ૫ સપ્ટેમ્બરના રોજ દેશના અગ્રણી શહેરોમાં રિટેલ ભાવ ઊંચા જાેવા મળ્યા હતા.
દિલ્હી: રૂ.૫૮ પ્રતિ કિલો
મુંબઈ: રૂ.૫૩ પ્રતિ કિલો
ચેન્નાઈ: રૂ.૬૩ પ્રતિ કિલો
રાંચી: રૂ.૪૦ પ્રતિ કિલો
સરકારના આ સક્રિય પગલાંથી શહેરી ગ્રાહકોને મોંઘવારીમાંથી આંશિક રાહત મળી રહી છે.
