UPI એ બનાવ્યો નવો રેકોર્ડ.UPIનો નાણાકીય વર્ષ ૨૦૨૬માં ટ્રાન્ઝેક્શનમાં ૩૦ ટકાનો વધારો. UPIનો વિકાસ દર સતત વધી રહ્યો છે. નાણાકીય વર્ષ ૨૪માં ટ્રાન્ઝેક્શન ૧૩૧ અબજ સુધી પહોંચ્યો.ભારતની ડિજિટલ પેમેન્ટ સિસ્ટમ UPI નવા રેકોર્ડ બનાવી રહી છે. નાણાકીય વર્ષ ૨૦૨૬ (FY26) માં તેમાં ૨૪૦ અબજ ટ્રાન્ઝેક્શન સુધી પહોંચવાનો અંદાજ છે, જે ગયા વર્ષ કરતા લગભગ ૩૦ ટકા વધુ છે. નેશનલ પેમેન્ટ્સ કોર્પોરેશન ઓફ ઈન્ડિયા (NPCI) ના ડેટા આ ઝડપી વૃદ્ધિની પુષ્ટિ કરે છે. જાે કે આ ઉછાળા વચ્ચે પેમેન્ટ કંપનીઓ હવે સરકાર પાસેથી નવા આવક મોડેલની માગ કરી રહી છે.
UPI નો વિકાસ દર સતત વધી રહ્યો છે. નાણાકીય વર્ષ ૨૪માં ટ્રાન્ઝેક્શન ૧૩૧ અબજ સુધી પહોંચ્યા, જે નાણાકીય વર્ષ ૨૫માં ૧૮૫ અબજ સુધી પહોંચ્યા. હવે નાણાકીય વર્ષ ૨૬માં તે ૨૪૦ અબજ સુધી પહોંચવાનો અંદાજ છે. આ આશરે ૩૦ ટકાની વાર્ષિક વૃદ્ધિ દર્શાવે છે.
જ્યારે આ ગયા વર્ષના ૪૧ ટકાના વિકાસ કરતા થોડો ઓછો છે, તે હજુ પણ ડિજિટલ ચુકવણીના વધતા ઉપયોગને સ્પષ્ટપણે દર્શાવે છે.
UPI એ દૈનિક વ્યવહારોમાં પણ નવા સીમાચિહ્નો હાંસલ કર્યા છે. આ નાણાકીય વર્ષમાં સરેરાશ ૬૫૭ મિલિયન ટ્રાન્ઝેક્શન દરરોજ થયા, જે ગયા વર્ષના ૫૦૬ મિલિયન કરતા નોંધપાત્ર રીતે વધારે છે. માર્ચમાં ૮૦૦ મિલિયન દૈનિક ટ્રાન્ઝેક્શનનો આંકડો પહેલી વાર વટાવી ગયો. સરકાર અને NPCI ૧ અબજ દૈનિક ટ્રાન્ઝેક્શન સુધી પહોંચવાનું લક્ષ્ય રાખે છે, જે વર્તમાન દરે આગામી નાણાકીય વર્ષમાં પ્રાપ્ત કરી શકાય તેવું લાગે છે.
ડિજિટલ પેમેન્ટ કંપનીઓ હવે મર્ચન્ટ ડિસ્કાઉન્ટ રેટ (MDR) પુન:સ્થાપિત કરવાની માગ કરી રહી છે. અગાઉ,UPI ચાર્જ ૦.૩ ટકા હતા, પરંતુ ૨૦૨૦માં તેને દૂર કરવામાં આવ્યા હતા. હવે, કંપનીઓ કહે છે કે સબસિડી પર આધાર રાખવો એ કાયમી ઉકેલ નથી. તેઓ માને છે કે મોટા વેપારીઓ પર MDR લાગુ કરવાથી તેમને સ્થિર આવકનો પ્રવાહ મળશે, ખાસ કરીને રૂપિયા ૪૦ લાખથી વધુ ટર્નઓવર ધરાવતા વેપારીઓ માટે.
