Mehsana Lok Sabha Election 2024 Live: દેશભરમાં લોકસભા ચૂંટણી 2024ની મતગાણતરી થઈ રહી છે. ત્યારે મહેસાણા બેઠક પરની મતગણતરી પૂર્ણ થઈ ગઈ છે. મહેસાણા બેઠક પરના કુલ મત 1059340 માંથી હાલ 817706 મત ગણતરી પૂર્ણ થઈ ગઈ છે. ત્યારે આ બેઠક પરથી ભાજપ અંગે ખુશીના સમાચાર સામે આવી રહ્યા છે. ભાજપના ઉમેદવાર હરિભાઈ પટેલને 248,325 મતોની લીડ સાથે જીત તરફ આગળ વધી રહ્યા છે. જોકે, હવે તેમની લીડને કોંગ્રેસ ઉમેદવાર ટક્કર આપી શકશે નહીં. જણાવી દઈએ કે, હરિભાઈ પટેલ સામે કોંગ્રેસના રામજીભાઈ ઠાકોર ચૂંટણી લડી રહ્યા હતા. જેમને 277167 મતો મળ્યા છે.
જણાવી દઈએ કે, મહેસાણાના વર્તમાન સાંસદ શારદાબેન પટેલ છે, 2019ની ચૂંટણીમાં તેમણે એ.જે. પટેલને 2.72 લાખ મતોથી હરાવ્યા હતા. આ ઉપરાંત, 2014માં જયશ્રી પટેલ કોંગ્રેસના જીવા પટેલને 2 લાખથી વધુ મતોથી હરાવીને સતત બીજી વખત સાંસદ બન્યા હતા. મહેસાણા લોકસભા બેઠકમાં કુલ 15 લાખ મતદારો છે. જેમાંથી 7,77,821 પુરૂષ મતદારો છે. જ્યારે 7,20,375 મહિલા મતદારો છે.
નોંધનીય છે કે, પાટીદારોનો ગઢ ગણાતી મહેસાણા લોકસભા બેઠક 1952માં અસ્તિત્વમાં આવી હતી. ગુજરાતના રાજકારણ માટે મહત્વની ગણાતી આ બેઠક પર વર્ષોથી પાટીદાર સાંસદો છે. તેથી આ બેઠક માટે પાટીદાર મતો મહત્વના રહે છે. વર્તમાન રાજકીય પરિસ્થિતિ પર નજર કરીએ તો 2009થી સતત ભાજપ અહીં સત્તામાં છે.
ગત લોકસભા ચૂંટણી 2019ની સરખામણીમાં આ વખતે ગુજરાતમાં ઓછું મતદાન થયું છે. લોકસભા ચૂંટણી 2024ના ત્રીજા તબક્કામાં ગુજરાતમાં 59.49 ટકા મતદાન થયું હતું. સૌથી વધુ 72.24 ટકા મતદાન વલસાડમાં અને સૌથી ઓછું 49.22 ટકા મતદાન અમરેલીમાં થયું હતું. નોંધનીય છે કે, છેલ્લી બે ટર્મ 2014 (63.66 ટકા) અને 2019 (64.12 ટકા)માં આ વખતે ગુજરાતમાં 10 વર્ષમાં સૌથી ઓછું મતદાન થયું હતું.
