મમતાની પાર્ટી તૃણમૂલ કોંગ્રેસ સામે નવું સંકટ પાર્ટીનું હેડક્વાર્ટર ખાલી કરવાની નોબત આવી બિલ્ડિંગના માલિકે પાર્ટી નેતૃત્વને આ જગ્યા ખાલી કરી દેવા માટે કહી દીધું છે, જેના માટે બે મહિનાની નોટીસ આપી પશ્ચિમ બંગાળની ચૂંટણીમાં કારમી હારનો સામનો કર્યા બાદ તૃણમૂલ કોંગ્રેસ (TMC)ની મુશ્કેલીઓ સતત વધી રહી હોય તેવું લાગી રહ્યું છે. કોલકાતામાં પોતાના વર્તમાન મુખ્ય મથક (હેડક્વાર્ટર)ને લઈને પાર્ટીને મોટો ઝટકો લાગ્યો છે. જે બિલ્ડિંગમાં અત્યારે TMC ની મુખ્ય ઓફિસ ચાલી રહી છે, તેના માલિકે પાર્ટી નેતૃત્વને આ જગ્યા ખાલી કરી દેવા માટે કહી દીધું છે. ચૂંટણીના પરિણામો બાદ આવેલી આ સમસ્યાએ મમતા બેનરજીની પાર્ટીની ચિંતાઓમાં વધારો કર્યો છે.
મળતી માહિતી મુજબ, બિલ્ડિંગના માલિકે TMC ના વરિષ્ઠ નેતાઓને મૌખિક રીતે જણાવી દીધું છે કે પાર્ટી આગામી બે મહિનાની અંદર આ પ્રોપર્ટી ખાલી કરી દે. એવું કહેવામાં આવી રહ્યું છે કે ચૂંટણીના પરિણામો જાહેર થયા બાદ બિલ્ડિંગ માલિકે પોતાની પ્રોપર્ટીની સુરક્ષાને લઈને ચિંતા વ્યક્ત કરી છે. આ સિવાય આ પ્રોપર્ટીના લીઝ એગ્રીમેન્ટનો સમયગાળો પણ પૂરો થઈ ગયો છે, જેના કારણે માલિકે હવે આ જગ્યા ખાલી કરાવવાનો ર્નિણય લીધો છે.
બીજી તરફ, સૂત્રોના જણાવ્યા અનુસાર,TMC નેતૃત્વએ પણ બિલ્ડિંગ માલિકને ભરોસો આપ્યો છે કે પાર્ટી ટૂંક સમયમાં જ પોતાની ઓફિસ બીજી જગ્યાએ શિફ્ટ કરી લેશે. તૃણમૂલ કોંગ્રેસે મે ૨૦૨૨માં આ ભાડાની બિલ્ડિંગમાં પોતાનું કામકાજ શરૂ કર્યું હતું. કોલકાતાના ઈસ્ટર્ન મેટ્રોપોલિટન બાયપાસની એકદમ નજીક આવેલી આ G+4 (ચાર માળની) બિલ્ડિંગમાંથી અત્યાર સુધી પાર્ટીની તમામ મુખ્ય ગતિવિધિઓ ચાલતી હતી, પણ હવે હારના આંચકા વચ્ચે પાર્ટીએ ટૂંક સમયમાં જ નવું અસ્થાયી ઠેકાણું શોધવું પડશે.
અહીં એ જાણવું પણ મહત્ત્વનું છે કે ટોપ્સિયા સ્થિત TMC નું અસલી હેડક્વાર્ટર અત્યારે આધુનિક ઓફિસ તરીકે રી-ડેવલપ કરવામાં આવી રહ્યું છે. ત્યાં બાંધકામ ચાલતું હોવાને કારણે જ પાર્ટીએ અસ્થાયી રૂપે પોતાનું મુખ્યાલય આ બિલ્ડિંગમાં શિફ્ટ કર્યું હતું. પરંતુ હવે આ અસ્થાયી ઓફિસ પણ ખાલી કરવાનો વારો આવતા ચૂંટણી હારની નિરાશા વચ્ચે તૃણમૂલ કોંગ્રેસ માટે આ એક મોટો રાજકીય અને વ્યવસ્થાપકીય ઝટકો માનવામાં આવી રહ્યો છે.
