થેમ્સ નદી પર ગંગા આરતી લંડનના હૃદયમાં ભારતીય સંસ્કૃતિ અને આધ્યાત્મિકતાનો સંગમ સ્થાનિક ઇકોસિસ્ટમની જાળવણી માટે આયોજકોએ તમામ ધાર્મિક વિધિઓનું કડક રીતે પાલન કર્યું હતું લંડનમાં ભારતીય સંસ્કૃતિ અને આસ્થાનો એક અનોખો અને ઐતિહાસિક નજારો જાેવા મળ્યો. રવિવાર, ૧૩ સપ્ટેમ્બરના રોજ થેમ્સ નદીના કિનારે પહેલીવાર ‘ગંગા આરતી’નું ભવ્ય આયોજન કરવામાં આવ્યું હતું. ગ્રીનવિચમાં આવેલી ‘ઓલ્ડ રોયલ નેવલ કોલેજ’ની નજીક યોજાયેલા આ કાર્યક્રમમાં વિવિધ સાંસ્કૃતિક પૃષ્ઠભૂમિના હજારો લોકો ઉમટી પડ્યા હતા. ‘ગંગા આરતી ઓન ધ થેમ્સ: અ સેરેમની ઓફ લાઈટ’ નામનો આ વિશેષ કાર્યક્રમ ‘ચિન્મય મિશન યુકે’ અને વાર્ષિક ‘ટોટલી થેમ્સ ફેસ્ટિવલ’ના સંયુક્ત ઉપક્રમે યોજાયો હતો. આ આયોજન વર્ષ ૧૯૫૧માં વેદાંતિક જ્ઞાન અને સમાજ સેવાના ઉદ્દેશ્યથી સ્થપાયેલા વૈશ્વિક આધ્યાત્મિક સંગઠન ‘ચિન્મય મિશન’ની ૭૫મી વર્ષગાંઠની વૈશ્વિક ઉજવણીનો એક અગત્યનો ભાગ હતો. આ કાર્યક્રમે પ્રકાશ, પ્રાર્થના અને આભાર પ્રગટ કરવાની ભારતીય પરંપરાને લંડનમાં જીવંત કરી હતી.આ સમારોહમાં વારાણસી, હરિદ્વાર અને ઋષિકેશમાં ગંગા કિનારે થતી સાંજની આરતી જેવો જ દિવ્ય અને આધ્યાત્મિક માહોલ સર્જવામાં આવ્યો હતો. પૂજારીઓ અને ભક્તોએ મંત્રોચ્ચાર કર્યા, સંગીતની સુરાવલીઓ રેલાવી અને પિત્તળના વિશાળ બહુ-સ્તરીય દીવાઓ પ્રગટાવીને નદીની આરતી ઉતારી. આયોજકોના મતે, આ વિધિ પ્રકૃતિ, જ્ઞાન અને ચેતનાના સતત વહેતા જીવનદાયી પ્રવાહનું પ્રતીક છે. ચિન્મય મિશનના નેતૃત્વએ ખાસ ભાર મૂક્યો હતો કે ગંગા ભૌતિક પોષણ અને આધ્યાત્મિક જ્ઞાનના પ્રસાર બંનેનું પ્રતિનિધિત્વ કરે છે. આ પવિત્ર અવસરે ચિન્મય મિશનના વૈશ્વિક વડા સ્વામી સ્વરૂપાનંદ, સ્થાનિક આધ્યાત્મિક નેતાઓ, યુકે હિન્દુ સંગઠનના પ્રતિનિધિઓ અને દક્ષિણ એશિયાઈ ડાયસ્પોરાના વિશાળ સમુદાયે હાજરી આપી હતી, જેના કારણે આખો કાર્યક્રમ હાઉસફુલ રહ્યો હતો.આ ધાર્મિક કાર્યક્રમની સૌથી મોટી વિશેષતા તેની પર્યાવરણ પ્રત્યેની સભાનતા હતી. સ્થાનિક ઇકોસિસ્ટમની જાળવણી માટે આયોજકોએ તમામ ધાર્મિક વિધિઓનું કડક રીતે પાલન કર્યું હતું.નદીઓ પ્રત્યેની પરંપરાગત શ્રદ્ધા અને સમકાલીન પર્યાવરણીય જવાબદારીના ઉત્તમ સમન્વય રૂપે આખા કાર્યક્રમ સ્થળે સિંગલ-યુઝ પ્લાસ્ટિક પર પણ સંપૂર્ણ પ્રતિબંધ મૂકવામાં આવ્યો હતો.આખો મહિનો ચાલતા ‘ટોટલી થેમ્સ ફેસ્ટિવલ’માં આ કાર્યક્રમની શાનદાર સફળતા અને લોકપ્રિયતા જાેતાં, આયોજકોને પૂરો વિશ્વાસ છે કે હવે આ ભવ્ય આરતી લંડનના સાંસ્કૃતિક કેલેન્ડરનો કાયમી વાર્ષિક હિસ્સો બની જશે.
