યુક્રેન યુદ્ધ પછી રાષ્ટ્રપતિ પુતિન પ્રથમ વખત ભારતની મુલાકાત લઈ શકે, પીએમ મોદીએ આપ્યું આમંત્રણ

રશિયાના રાષ્ટ્રપતિ વ્લાદિમીર પુતિન આવતા વર્ષે (2025) ભારતની મુલાકાત લઈ શકે છે. તેઓ અહીં વાર્ષિક સમિટમાં ભાગ લેવા આવશે. વિદેશ મંત્રાલયે શુક્રવારે આ જાણકારી આપી. જો કે પ્રવાસની તારીખ હજુ નક્કી કરવામાં આવી નથી. કહેવામાં આવી રહ્યું છે કે તારીખો રાજદ્વારી માધ્યમો દ્વારા નક્કી કરવામાં આવશે. તમને જણાવી દઈએ કે, મોસ્કોમાં છેલ્લી વાર્ષિક સમિટનું આયોજન કરવામાં આવ્યું હતું, જેના માટે વડાપ્રધાન મોસ્કો ગયા હતા. પીએમ મોદીએ 22મી ભારત-રશિયા વાર્ષિક સમિટ માટે 8 અને 9 જુલાઈ 2024ના રોજ રશિયાની મુલાકાત લીધી હતી. આ સંદર્ભમાં માહિતી આપતાં ક્રેમલિનના સહાયક યુરી ઉષાકોવે કહ્યું હતું કે વડા પ્રધાન નરેન્દ્ર મોદીએ પુતિનને ભારત આવવાનું આમંત્રણ મોકલ્યું છે.

પુતિનની મુલાકાતની તારીખ નક્કી કરવામાં આવી નથી

સમાચાર એજન્સી પીટીઆઈના અહેવાલ મુજબ, વિદેશ મંત્રાલયના પ્રવક્તા રણધીર જયસ્વાલે શુક્રવારે કહ્યું કે રાષ્ટ્રપતિ પુતિનની મુલાકાતની તારીખો 2025ની શરૂઆતમાં નક્કી કરવામાં આવશે. યુરી ઉશાકોવે કહ્યું કે અમને પીએમ મોદીનું આમંત્રણ મળ્યું છે અને અમે ચોક્કસપણે તેના પર સકારાત્મક વિચારણા કરીશું. વર્ષ 2022માં યુક્રેન અને રશિયા વચ્ચે ચાલી રહેલા યુદ્ધ બાદ રાષ્ટ્રપતિ પુતિનની આ પ્રથમ ભારત મુલાકાત હશે. યુક્રેન અને રશિયા વચ્ચેના સંઘર્ષને ઉકેલવા માટે ભારતે હંમેશા શાંતિ અને કૂટનીતિની હિમાયત કરી છે.