ભારતમાં અબજપતિઓની સંખ્યામાં વધારો ચીન-અમેરિકા બાદ દુનિયામાં ત્રીજા સ્થાને : હુરુન રિપોર્ટ ભારતમાં અબજપતિઓની કુલ સંખ્યા વધીને ૩૦૮ થઈ ગઈ છે, જે ગયા વર્ષની સરખામણીએ ૨૪ વધુ છે હુરુન રિસર્ચ ઇન્સ્ટિટ્યૂટ દ્વારા જાહેર કરવામાં આવેલા હુરુન ગ્લોબલ રિચ લિસ્ટ ૨૦૨૬માં ભારતની આર્થિક પ્રગતિની ચમક જાેવા મળી છે. રિપોર્ટ અનુસાર, ભારતમાં અબજપતિઓની સંખ્યામાં નોંધપાત્ર વધારો થયો છે અને ભારત હવે વિશ્વમાં અબજપતિઓની સંખ્યાની દ્રષ્ટિએ ત્રીજા સ્થાને પહોંચી ગયું છે.
રિપોર્ટ અનુસાર, ભારતમાં અબજપતિઓની કુલ સંખ્યા વધીને ૩૦૮ થઈ ગઈ છે, જે ગયા વર્ષની સરખામણીએ ૨૪ વધુ છે. વૈશ્વિક સ્તરે અમેરિકા પ્રથમ અને ચીન બીજા ક્રમે છે. ભારતીય અબજપતિઓની કુલ સંપત્તિમાં ૧૦ ટકાનો વધારો થયો છે, જે હવે ૧૧૨.૬ લાખ કરોડ રૂપિયા પર પહોંચી છે. ભારતની આર્થિક રાજધાની મુંબઈ અબજપતિઓનું મનપસંદ શહેર બની રહ્યું છે. મુંબઈમાં હાલ ૯૫ અબજપતિઓ વસે છે. આ વર્ષે મુંબઈમાં ૧૫ નવા અબજપતિઓ ઉમેરાયા છે, જે ન્યૂયોર્ક (૧૪) અને લંડન (૯) કરતા પણ વધારે છે. વૈશ્વિક સ્તરે અબજપતિ શહેરોની યાદીમાં ન્યૂયોર્ક (૧૪૬) ટોચ પર છે, જ્યારે એશિયામાં ચીનનું શેનઝેન ૧૩૩ અબજપતિઓ સાથે આગળ છે.
ભારતમાં અબજપતિઓ હવે માત્ર પરંપરાગત ઉદ્યોગો પૂરતા મર્યાદિત નથી રહ્યા. હેલ્થકેર સેક્ટરમાં સૌથી વધુ ૫૩ અબજપતિઓ છે. ઇન્ડસ્ટ્રિયલ પ્રોડક્ટ્સ સેક્ટરમાં ૩૬ અબજપતિઓ સાથે બીજા ક્રમે. જ્યારે એનર્જી સેક્ટરમાં અબજપતિઓની સંખ્યા ઓછી હોવા છતાં સંપત્તિની દ્રષ્ટિએ આ સેક્ટર સૌથી શક્તિશાળી છે. દેશની કુલ અબજપતિ સંપત્તિના ૧૬ ટકા એટલે કે ૧૮.૩ લાખ કરોડ રૂપિયા માત્ર આ ૮ અબજપતિઓ પાસે છે. હુરુન રિપોર્ટમાં જણાવાયું છે કે ભારતના અબજપતિઓમાં મહિલાઓનો હિસ્સો ૭ ટકા છે. દેશમાં ૨૩ મહિલા અબજપતિઓ પાસે કુલ ૯.૮ લાખ કરોડ રૂપિયાની સંપત્તિ છે. ભારતીય અબજપતિઓની સરેરાશ ઉંમર ૬૭ વર્ષ નોંધાઈ છે, જે વૈશ્વિક સરેરાશ (૬૫ વર્ષ) કરતા થોડી વધારે છે.
