તાલિબાને આપી બદલાની ધમકી અફઘાનિસ્તાનમાં પાકિસ્તાનની ૧૦ અલગ સ્થળો પર એરસ્ટ્રાઈક પાકિસ્તાન અને અફઘાનિસ્તાન વચ્ચે ઇસ્લામિક આતંકવાદીઓના હુમલા અને સરહદ પારની ગતિવિધિઓને લઈને તણાવ પાકિસ્તાન દ્વારા અફઘાનિસ્તાનમાં આવેલા ૧૦ અલગ-અલગ સ્થળો પર હવાઈ અને ડ્રોન હુમલા કરવામાં આવ્યા હોવાની સત્તાવાર જાહેરાત કરવામાં આવી છે. પાકિસ્તાનના માહિતી મંત્રી અત્તાઉલ્લાહ તરારે જણાવ્યું હતું કે આ સ્થળોનો ઉપયોગ ડ્રોન સ્ટોર કરવા અને તેના દ્વારા હુમલા કરવા માટે કરવામાં આવતો હતો. જેમાંથી કેટલાક ડ્રોનનો ઉપયોગ એક દિવસ અગાઉ પાકિસ્તાન વિરુદ્ધ કરવામાં આવ્યો હતો. પાકિસ્તાની વાયુસેના દ્વારા આ હુમલાઓ મર્યાદિત લશ્કરી ઉદ્દેશ્યોને ધ્યાનમાં રાખીને ચોકસાઈપૂર્વક પાર પાડવામાં આવ્યા છે અને અફઘાનિસ્તાન તરફથી જાે કોઈ વધુ ઉશ્કેરણીજનક પગલું ભરાશે તો તેનો મક્કમ જવાબ આપવામાં આવશે તેમ પણ સ્પષ્ટ કરવામાં આવ્યું છે.
પાકિસ્તાન અને અફઘાનિસ્તાન વચ્ચે ઇસ્લામિક આતંકવાદીઓના હુમલા અને સરહદ પારની ગતિવિધિઓને લઈને લાંબા સમયથી તણાવ ચાલી રહ્યો છે, જેના કારણે બંને દેશો વચ્ચે અગાઉ ફેબ્રુઆરી મહિનામાં પણ ભારે સંઘર્ષ જાેવા મળ્યો હતો. ઇસ્લામાબાદ દ્વારા વારંવાર એવા આક્ષેપો કરવામાં આવે છે કે કાબુલ સરકાર પાકિસ્તાન વિરોધી આતંકવાદીઓને આશ્રય આપી રહી છે, જ્યારે અફઘાનિસ્તાનની તાલિબાન સરકારે આ તમામ આરોપોને નકારી કાઢ્યા છે અને સ્પષ્ટ કર્યું છે કે આંતરિક સુરક્ષા એ પાકિસ્તાનની પોતાની સમસ્યા છે. તાજેતરની ઘટનામાં પાકિસ્તાનની એર ડિફેન્સ સિસ્ટમ દ્વારા અફઘાનિસ્તાનની સરહદ પરથી છોડવામાં આવેલા ડ્રોન્સને ડિટેક્ટ કરવામાં આવ્યા હતા, જેને નિષ્ક્રિય કર્યા બાદ આ કાર્યવાહી કરવામાં આવી છે. અફઘાનિસ્તાનના ખોસ્ત પ્રાંતના પ્રવક્તા મુસ્તગફિર ગુરબાજે જણાવ્યું હતું કે આ હુમલાઓ ખોસ્ત પ્રાંતના કેટલાક વિસ્તારોમાં થયા છે, જાેકે આ હુમલાઓમાં કોઈ જાનહાનિ થયાના અહેવાલ નથી. આ અગાઉ પાકિસ્તાનના ઉત્તરપશ્ચિમ વિસ્તારમાં આવેલી એક પોલીસ મુખ્યમથક પર થયેલા હુમલામાં આશરે ૨૪ લોકોનાં મોત નીપજ્યાં હતાં, જેના કારણે લગભગ ૩ મહિનાની શાંતિ બાદ બંને દેશો વચ્ચે ફરીથી અથડામણો શરૂ થઈ ગઈ છે. પાકિસ્તાન સરકાર દ્વારા અગાઉ પણ અફઘાનિસ્તાન સરહદ નજીક હવાઈ હુમલા કરવામાં આવ્યા હોવાનો દાવો કરાયો હતો, જ્યારે અફઘાન તાલિબાન અધિકારીઓએ પાકિસ્તાન પર નાગરિકોને નિશાન બનાવવાનો આરોપ મૂક્યો છે.
