ભારતે ૭ મેના રોજ પાકિસ્તાનમાં ઓપરેશન સિંદૂર હાથ ધરીને પહેલગામ હુમલાનો બદલો લીધો. ભારતની આ કાર્યવાહી બાદ પાકિસ્તાનમાં ગભરાટનો માહોલ છે. આની અસર પાકિસ્તાન સુપર લીગ પર પણ પડી છે. પાકિસ્તાન ક્રિકેટ બોર્ડે સ્પષ્ટ કર્યું હતું કે પીએસએલ ચાલુ રહેશે પરંતુ તેમણે મેચોને લઈને મોટો નિર્ણય લીધો છે. આ બધા વચ્ચે, પાકિસ્તાનમાં વિદેશી ખેલાડીઓ સુરક્ષિત અનુભવતા નથી અને તેઓ લીગ છોડીને પોતાના દેશમાં પાછા ફરવા માંગે છે. બધી મેચ કરાચી ખસેડાઈ
અહેવાલો અનુસાર, 7 મેના રોજ ગદ્દાફી સ્ટેડિયમમાં એક બેઠક યોજાઈ હતી. આ બેઠકમાં PCB અધિકારીઓ ઉપરાંત, તમામ ફ્રેન્ચાઇઝીના માલિકો અને પ્રતિનિધિઓ હાજર રહ્યા હતા. બેઠકમાં ટુર્નામેન્ટની સુરક્ષા અંગે ચર્ચા કરવામાં આવી હતી અને PCBએ નિર્ણય લીધો છે કે હવે લીગની બાકીની બધી મેચ કરાચીમાં રમાશે.
ઈંગ્લેન્ડ ક્રિકેટ બોર્ડે ખેલાડીઓ સાથે વાત કરી
ભારત-પાકિસ્તાન સરહદ પર વધી રહેલા તણાવ વચ્ચે, ઈંગ્લેન્ડ ક્રિકેટ બોર્ડ પાકિસ્તાનમાં તેના ખેલાડીઓના સંપર્કમાં છે. તેમણે પરિસ્થિતિની ચર્ચા કરવા માટે તાત્કાલિક ફોન પણ કર્યો. બોર્ડે હાલમાં ખેલાડીઓને પાછા ફરવાની મંજૂરી આપવાનો ઇનકાર કર્યો છે, પરંતુ જો યુકે સરકાર ECBને આદેશ આપે છે, તો ખેલાડીઓને પાછા ફરવાનું કહેવામાં આવી શકે છે.
આ ખેલાડીઓ દેશ પાછા ફરવા માંગે છે
પાકિસ્તાન સુપર લીગમાં ઇંગ્લેન્ડના સાત ખેલાડીઓ રમી રહ્યા છે. સેમ બિલિંગ્સ, જેમ્સ વિન્સ, ટોમ કુરન, ડેવિડ વિલી, ક્રિસ જોર્ડન, ટોમ કોહલર અને લ્યુક વુડ અલગ અલગ ટીમોનું પ્રતિનિધિત્વ કરી રહ્યા છે. સમાચાર અનુસાર, વિલી અને જોર્ડને તેમની ફ્રેન્ચાઇઝી મુલતાન સુલ્તાન્સને અપીલ કરી છે કે તેઓ પાછા ફરવા માંગે છે. મુલતાન સુલ્તાનની ટીમ પ્લેઓફની દોડમાંથી બહાર થઈ ગઈ છે અને લીગ રાઉન્ડમાં તેની માત્ર એક જ મેચ બાકી છે.
ઈંગ્લેન્ડ ઉપરાંત, લીગમાં ઘણા અન્ય મોટા આંતરરાષ્ટ્રીય ખેલાડીઓનો પણ સમાવેશ થાય છે. આમાં ઓસ્ટ્રેલિયાના ડેવિડ વોર્નર, વેસ્ટ ઈન્ડિઝના જેસન હોલ્ડર અને દક્ષિણ આફ્રિકાના રાસી વાન ડેર ડુસેનનો સમાવેશ થાય છે.
