રાજસ્થાન રોયલ્સ માટે IPL 2025 ખૂબ જ ખરાબ રહ્યું છે. ટીમ પહેલાથી જ પ્લેઓફની રેસમાંથી બહાર થઈ ગઈ છે. હવે રાજસ્થાનને મોટો ઝટકો લાગ્યો છે. ટીમનો સ્ટાર ખેલાડી નીતિશ રાણા ટુર્નામેન્ટમાંથી બહાર થઈ ગયો છે. ખરેખર, નીતિશ રાણા ઈજાને કારણે ટુર્નામેન્ટમાંથી બહાર થઈ ગયો છે. નીતિશના સ્થાને દક્ષિણ આફ્રિકાના એક મજબૂત ખેલાડીનો ટીમમાં સમાવેશ કરવામાં આવ્યો છે.
લુઆન-ડ્રે પ્રિટોરિયસની એન્ટ્રી
નીતીશ રાણાના ટુર્નામેન્ટમાંથી બહાર થયા બાદ રાજસ્થાન રોયલ્સે 19 વર્ષીય દક્ષિણ આફ્રિકાના ડાબા હાથના ખેલાડી લુઆન-ડ્રે પ્રિટોરિયસને ટીમમાં સામેલ કર્યો છે. રાજસ્થાન રોયલ્સ પાસે પહેલાથી જ ડાબોડી બેટ્સમેન યશસ્વી જયસ્વાલ અને વૈભવ સૂર્યવંશી છે અને પ્રિટોરિયસનો સમાવેશ આરઆર માટે એક રસપ્રદ પગલું છે.
લુઆન પહેલેથી જ રોયલ્સ પરિવારનો ભાગ છે, જે SA20 માં પાર્લ રોયલ્સ સેટઅપમાં રહ્યો છે. SA20 2025 માં પ્રિટોરિયસે ક્રિકેટ ચાહકોમાં ઘણી ખ્યાતિ મેળવી. પોતાની પહેલી એલિટ ફ્રેન્ચાઇઝ ટુર્નામેન્ટ રમતા, આ યુવા ખેલાડીએ 166.81 ના પ્રભાવશાળી સ્ટ્રાઇક રેટથી 397 રન બનાવ્યા અને ટુર્નામેન્ટમાં સૌથી વધુ રન બનાવનાર ખેલાડી તરીકે સ્થાન મેળવ્યું.
રાજસ્થાન રોયલ્સ ખેલાડીઓની ઇજાઓ સામે ઝઝૂમી રહી છે
આ ટુર્નામેન્ટમાં, રાજસ્થાન રોયલ્સ ટીમ તેના ખેલાડીઓની ઇજાઓ સામે ઝઝૂમી રહી છે. કેપ્ટન સંજુ સેમસન પણ ઈજાને કારણે બધી મેચ રમી શક્યો નથી, આ સિવાય ટીમનો સ્ટાર ફાસ્ટ બોલર સંદીપ શર્મા પણ ઈજાને કારણે ટુર્નામેન્ટમાંથી બહાર થઈ ગયો હતો.
