દિવાળી બાદ ભરપૂર મોર ખીલ્યો હતો વલસાડના આંબાના મોર ખરવા લાગ્યા, હાફૂસ કેરીના ઉત્પાદન પર થશે અસર બદલાતા વાતાવરણે ખેડૂતોની ચિંતામાં વધારો કરી નાંખ્યો હાફૂસ કેરીનો ગઢ ગણાતા વલસાડ જિલ્લામાં ખેડૂતોને રાતા પાણીએ રોવાનો વારો આવ્યો છે. સિઝનની જ્યારે શરૂઆત થઈ હતી ત્યારે આંબા પર સારું ફ્લાવરિંગ થતા ખેડૂતોની ખુશીનો પાર ન હતો. પરંતુ જેમ જેમ દિવસો જતા ગયા તેમ તેમ વાદળછાયું વાતાવરણ અને ગરમીને કારણે કેરીના પાક પર અસર થઈ છે. વલસાડ જિલ્લામાં આ વખતે પણ કેરીના પાકમાં મોટું નુકસાન થવાની શક્યતાઓ જાેવાઈ રહી છે. હાફૂસ કેરીનું ઓછું ઉત્પાદન થવાને કારણે બજારમાં કેરીની કિંમતો વધારે હોવાની પણ ભીતિ સેવાઈ રહી છે.
આ વર્ષે દિવાળી બાદ વલસાડ જિલ્લામાં આંબાવાડીઓમાં આંબા ઉપર ભરપૂર મોર ખીલ્યો હતો. આથી આ વર્ષે ખેડૂતોને કેરીના પાકનું બમ્પર ઉત્પાદન થશે તેવી આશા હતી. જાેકે થોડા સમય અગાઉ અચાનક બદલાયેલા વાતાવરણને કારણે દિવસો સુધી વાદળછાયું વાતાવરણ સાથે વહેલી સવારે ધુમ્મસ છવાઈ જતું હતું.
ત્યાર બાદ હવે સવારે ઠંડી અને બપોરે તીવ્ર ગરમી પણ પડી રહી છે. જેની સીધી અસર કેરીના પાક પર થઈ રહી છે. આથી આંબા ઉપર આવેલા મોટાભાગનો મોર ખરી રહ્યા છે.
હવે વહેલી સવારે ઠંડી અને બપોરે ભારે ગરમીને કારણે આંબા ઉપર ફૂટેલી કેરીની કણ પણ ખરી રહી છે.
કેરીના પાક અંગે વલસાડના ખેડૂતે જણાવ્યું છે કે, અમે ૧૦ વર્ષ પહેલા ૭૦૦-૮૦૦ મણ કેરી પકવતા હતા આ વર્ષે તો અમને ૧૦૦ મણ કેરીનો પાક આવે તેવી પણ આશા નથી. વધુ એક ખેડૂતે જણાવ્યું છે કે, નવેમ્બર ડિસેમ્બરમાં અમને લાગતું હતું કે, અમારે કેરીનો પાક સારો રહેશે પરંતુ પછીથી જે વાદળછાયું વાતાવરણ છવાયું જેના કારણે મોર ખરવા લાગ્યા છે. હવે ગરમી પડી રહી છે. તેથી ગરમી પડશે કે નહીં પડે તે અંગે કાંઈ કહી શકાય નહીં.
આ સાથે અન્ય એક ખેડૂતે જણાવ્યું છે કે, આ વખતે દિવાળી પછી પુષ્કળ ફ્લાવરિંગ હતું. જેથી અમે તેનું માવજત કરી અને દવાઓનો પણ છંટકાવ કર્યો હતો તો પણ વાદળ આવવાને કારણે અને અત્યારે ગરમી ચાલુ થવાને કારણે કેરીનો પાક જવા પર જ છે. ઝાડ પર જે મોર લાગેલા છે તે કાળા પડી ગયા છે અને તેમાં રહેલી કણી પીળી થઈને ખરવા લાગી છે. છેલ્લા પાંચ વર્ષથી જે રીતે કેરીનો પાક નિષ્ફળ જાય છે તેવી જ રીતે આ વર્ષે પણ પાક નિષ્ફળ જવાની ભીતિ છે.
